Մեծ Պահքի շրջանում Ս. Հաղորդություն հնարավոր է ստանալ միայն երեք օր` ապրիլի 7-ին` Ս. Մարիամ Աստվածածնի Ավետման տոնին, ապրիլի 9-ին, որը խորհրդանշում է Ս. Գրիգոր Լուսավորչի մուտքը Խոր Վիրապ, և ապրիլի 17-ին`Ծաղկազարդին կամ այլ կերպ ասած` Երուսաղեմ Հիսուսի հաղթական մուտքի օրը: Այդ օրերին բոլոր եկեղեցիներում կմատուցվի Ս. Պատարագ, որի ավարտին Ս. Հաղորդություն կբաշխվի:
Հիշեցնենք, որ Մեծ Պահքն այս տարի սկսվել է մարտի 7-ին և կշարունակվի մինչև ապրիլի 24-ը:
Հաղորդվելու խորհուրդը
Հաղորդվել` նշանակում է հաղորդակցության մեջ պահել արարածին՝ Արարչի հետ, մեղավորին՝ Քավչարարի հետ, փրկվածին՝ Փրկչի հետ: Այս խորհրդով կենսական կապ է ստեղծվում քրիստոնյայի և Քրիստոսի միջև:
Հաղորդվողները, Ս. Պատարագի ժամին ճաշակելով Տիրոջ Մարմինն ու Արյունը, խորհրդաբար միանում են ոչ միայն Աստծուն, այլև իրար, և այդպիսով կազմում են Քրիստոսի Մարմինը՝ Եկեղեցին:
Ս. Հաղորդության խորհուրդը Եկեղեցու բոլոր անդամներին մեկտեղում է եղբայրական սիրո և խաղաղության կապով:
Առանց այս խորհրդի՝ Եկեղեցին չի կարող ապրել, քրիստոնյան չի կարող Երկնքի Արքայության ժառանգորդ դառնալ, հետևաբար` չի կարող հավիտենական կյանք ժառանգել.
«Ով ուտում է Իմ Մարմինը և ըմպում Իմ Արյունը,
հավիտենական կյանք ունի.
և Ես նրան վերջին օրը հարություն առնել պիտի տամ,
քանի որ Իմ Մարմինը ճշմարիտ կերակուր է,
և Իմ Արյունը՝ ճշմարիտ ըմպելիք:
Ով ուտում է Իմ Մարմինը և ըմպում Իմ Արյունը,
կբնակվի Իմ մեջ և Ես նրա մեջ» (Հովհ. Զ 54-57):