«Մենք հարգում ենք Երևանի՝ Մաքսային միության անդամ դառնալու որոշումը: Բայց մենք Հայաստանի հետ համագործակցություն ունենալու համար երբեք դուռը չենք փակում»,- այսօր լրագրողների հետ զրույցում հայտարարեց Եվրոպական խորհրդարանի փոխնախագահ Ռիչարդ Չառնեցկին:
Վերջինս Ազգային ժողովում հանդիպում էր Արտաքին հարցերի մշտական հանձնաժողովի անդամների հետ և քննարկում Հայաստան-Եվրամիություն հարաբերությունների հետ կապված հարցեր: Լրագրողների հետ զրույցում Ռ.Չառնեցկին անդրադարձավ նաև Արևմուտքի՝ Ռուսաստանի նկատմամբ կիրառած պատժամիջոցների և Հայաստանի վրա դրանց բացասական ազդեցության հետ կապված հարցին: «Ռուսաստանի կողմից Ղրիմի օկուպացիայից հետո ԵՄ-ի պատժամիջոցները շատ օգտակար գործիք են, և ես սատարում եմ ԵՄ-ի այդ քաղաքականությանը: Ես տեղյակ եմ, որ ՌԴ-ում տնտեսական վիճակը շատ վատ է: Ցավալի է, որ Հայաստանի տնտեսությունը կախված է ՌԴ-ի տնտեսությունից»,- ասաց Եվրոպայի խորհրդարանի փոխնախագահը:
Պատասխանելով հարցին, թե Եվրասիական տնտեսական միությանը Հայաստանի անդամակցումից հետո ինչպես է պատկերացնում Հայաստան-Եվրամիություն համագործակցությունը, Ռ.Չառնեցկին պատասխանեց. «Մենք բաց ենք Հայաստանի հետ կոնկրետ համագործակցության՝ հիմա գուցե ավելի շատ քաղաքական, բայց աստիճանաբար նաև տնտեսական ոլորտում»:
Անդրադառնալով «Առաջին լրատվական»-ի հարցին, թե Ասոցացման համաձայնագրի ստորագրումը ձախողվելուց հետո ԵՄ-ն Հայաստանի հետ համագործակցության ինչ ձևաչափ է մշակում, Ռ.Չառնեցկին ասաց, որ այդ քննարկումները փակ են և չեն կարող լինել տեսախցիկների առաջ: Արդյոք ԵՄ-ն Հայաստանի հետ քննարկում է ունենալ նաև տնտեսական համագործակցություն, թե՞ այն առայժմ ունենալու է քաղաքական բնույթ: «Մոլդովայի և Ուկրաինայի հետ մեր համաձայնագիրը և տնտեսական է, և քաղաքական: Սկզբնական շրջանում Հայաստանի և Բրյուսելի համար քննարկվում է քաղաքական համագործակցությունը: Բայց մենք պետք է մտածենք նաև տնտեսական համագործակցության մասին, և դա հնարավոր է»,- պատասխանեց Ռ.Չառնեցկին:
