Ինչպես հայտնի է, Բելառուսի խորհրդարանը ևս վավերացրել է Եվրասիական տնտեսական միությանը Հայաստանի անդամակցելու մասին պայմանագիրը: Բելառուսի արտաքին գործերի նախարարի տեղակալ Ալեքսանդր Միխնևիչը, ներկայացնելով Հայաստանի անդամակցության մասին պայմանագրի վավերացման օրինագիծը, ընդգծել է, որ Լեռնային Ղարաբաղը չի ընդգրկվի ԵՏՄ-ի կազմում Հայաստանի անդամակցությունից հետո: «Մենք անհանգստություն ունեինք, որ այն տարածքները, որոնք չեն գտնվում Հայաստանի կազմում, կարող են հայտնվել Մաքսային միության կազմում։ Հայկական կողմն ըմբռնումով մոտեցավ այդ պահանջին, այդ ցանկությանը։ Պայմանագրին կցվել է նոտա այն մասին, որ Լեռնային Ղարաբաղը Հայաստանի Հանրապետության մաս չի կազմում։ Հնչել է հայկական կողմի պաշտոնական բանավոր հայտարարությունը»,- ասել է նա։
Արդյոք այս հայտարարությունն այնուամենայնիվ նշանակում է, որ ինչ-որ պահի հնարավոր է Հայաստանի և ԼՂՀ-ի միջև մաքսակետի առկայություն՝ հետաքրքրվեցինք ԼՂՀ վարչապետ Արա Հարությունյանից: Վերջինս «Առաջին լրատվական»-ի հետ զրույցում ասաց, որ դեռ չի ծանոթացել Ալեքսանդր Միխնևիչի հայտարարությանը, բայց ինչ վերաբերում է մաքսակետին, ապա վարչապետը վերահաստատեց, որ մաքսակետի հարցը փակված է: «Մաքսակետ չի լինելու, այդ հարցը հանված է օրակարգից»,- ասաց վարչապետը:
Ինչ վերաբերում է վերջին օրերին փոխարժեքի տատանումներով պայմանավորված վիճակին, ապա Արա Հարությունյանի խոսքով՝ ՀՀ իշխանությունների կողմից ձեռնարկվեցին բավարար միջոցներ իրավիճակը շտկելու ուղղությամբ: «Իհարկե, քայլերը ոչ միայն բավարար էին, այլ շատ ակտիվ և շատ արդյունավետ աշխատանք տարվեց, որից հետո Արցախում ևս դրամը սկսեց արժևորվել: Այս պահին վիճակը նույնն է՝ ինչ Հայաստանում»,- ասաց վարչապետը:
