Իջևանում նախօրեին՝ դեկտեմբերի 17-ին, որոշ խանութներ օրվա կեսին փակ են եղել հաճախորդների համար: «Առաջին լրավական»-ի հետ զրույցում Իջևանի շուկայի մրգավաճառ Սերգեյը տեղեկացրեց, որ իրավիճակը երեկոյան շտկվել է, խանութները բացվել են:
«Շուկայի մոտի 3 խանութներ փակվեցին մոտ 5 ժամով: Հարցնում էինք, խանութի աշխատողներն ասում էին՝ չենք կարողանում ապրանքների վրա գին դնենք, ամեն պահ Երևանից մի նոր տեղեկություն ենք ստանում գների հետ կապված»,- հայտնում է նա:
Այսօր իրավիճակը մասամբ կայունացել է՝ չնայած նախկին գները դեռ չեն վերականգնվել. «Նախօրեին էլ խանութների բացումը օրվա վերջում եղավ, տեսնենք, սպասում ենք, որ գները կիջեն. ձուն, ալյուրը, շաքարավազը, այ դրանց գներն էր օդ հասել»:
Վանաձորում պատկերն այլ է, նախօրեի խուճապից հետո գները կամաց-կամաց իջնում են: Խանութներում չորեքշաբթի օրը շաքարավազի մեկ կիլոգրամը վաճառվել է մինչև 750 դրամով, երեկ գները տատանվել են 450-480-ի սահմաններում: Նույն օրը հացի գինը հասել է մինչև 330 դրամի, երեկ 150-170 դրամի սահմաններում էր:
«Չորեքշաբթի օրը ոսպի, հնդկաձավարի ու բրինձի համար հերթեր էին գոյացել գրեթե բոլոր խանութներում: 1 կիլոգրամի գինն անցնում էր անգամ 900 դրամի սահմանը: Մարդիկ տեղեկատվության պակաս ունեին, դրա համար այս վիճակը ստեղծվեց: Խուճապ էր՝ անգամ խոսակցություններ կային, որ հնարավոր է՝ դրամը փոխվի ռուբլու»,- պատմեց Արմինեն, որը երեկ եղել է մի քանի վանաձորյան խանութներում և իրավիճակին մոտիկից ծանոթացել:
Վանաձորի խանութներում հիմա նախօրեի խուճապը թեև չկա, սակայն ըստ Արմինեի՝ խանութներում ապրանք կա, բայց գրեթե գնորդ չկա: Պատճառն այն է, որ մարդիկ երեկ իրենց խնայողությունները հանել են և մոտ մեկ ամսվա առաջին անհրաժեշտության գնումներ կատարել:
«Դուք մենակ տեսնեիք հերթերը, հրմշտոցները, շաքարավազը ամենաքիչը գնվում էր 5 կիլոգրամով, իսկ մի քիչ ապահովվածները պարկով էին ալյուր և շաքարավազ գնում»,- ավելացրեց մեր զրուցակիցը:
