Թուրքական Miliyet թերթի հաղորդմամբ, այսօր Թուրքիայում թեժ իրադարձություններ են սպասվում, քանի որ լրանում է Շանլըուրֆայում ծնված, «Քրդստանի աշխատավորական» կուսակցության (PKK) հիմնադիր Աբդուլլահ Օջալանի ծննդյան 62 տարին:
Արդեն երեկվանից սկսած` տասնյակ հազարավոր քրդեր Շանլըուրֆա նահանգում դուրս են եկել փողոց` պատրաստվելով Օջալանի ծննդյան 62-րդ տարեդարձին: Նրանք սկսել են փակցնել PKK-ի դրոշներն ու Օջալանի պատկերով պաստառներ: Դա վերաբերում է մասնավորապես Հալֆեթի շրջանին, ուր քրդերը վրաններ են պատրաստել գիշերելու և վաղ առավոտյան դեպի Օջալանի ծննդավայր Օմերլի գյուղ երթով շարժվելու համար:
Նշվում է, որ Թուրքիայի արևելյան ու հարավարևելյան նահանգներից բազմաթիվ քրդեր են ժամանել և ժամանում Շանլըուրֆա: Թուրքական կողմը նույնպես նախապատրաստվում է Օջալանի ծննդյան օրվան և անվտանգության խիստ միջոցառումներ է ձեռնարկել` Հալֆեթիում կենտրոնացնելով 3000 ոստիկան և 3000 զինվոր:
Հիշեցնենք, որ Օջալանը 1978 թվականին հիմնել է PKK-ն: 1999 թվականի փետրվարի 15-ին ձերբակալվել է Քենիայի մայրաքաղաք Նայրոբիում, իսկ հունիսի 29-ին Թուրքիայի Քրեական օրենսգրքի 125-րդ հոդվածով «հայրենիքի դավաճանության» մեղադրանքով դատապարտվել մահվան:
Դա բողոքի մեծ ալիք էր բարձրացրել քրդերի շրջանում և ԵՄ-ում, ինչի արդյունքում Թուրքիայի Վճռաբեկ դատարանը 1999 թթվականի նոյեմբերի 25-ին բեկանեց այդ վճիռը:
2010 թվականի ամռանը Թուրքիայի արդարադատության նախկին նախարար Հիքմեթ Սամի Թուրքը բացահայտել, է թե ժամանակին ինչու թուրքական իշխանությունները մահապատժի չենթարկեցին ներկայումս Մարմարա ծովի Իմրալը կղզում ցմահ բանտարկված Աբդուլլահ Օջալանին.
«Այն ժամանակ Օջալանի հետ միասին պետք է մահապատժի ենթարկեին ևս 60 հոգու։ Եթե միանգամից 60 հոգու կախաղան հանեինք, Թուրքիան կդառնար կախաղանների երկիր, ուստի հրաժարվեցինք մահապատժի գաղափարից»:
