«Արաբական աշխարհում տեղի ունեցող դեպքերի ուղղակի կրկնությունը մեր տարածաշրջանում հնարավոր չէ, քանզի արաբական աշխարհի պրոցեսները տարիների ընթացքում այնտեղ ձևավորված համակարգերի դեմ էին, ինչն էլ զարգացման իմաստով իրեն արդեն սպառել է, և այնտեղ նոր մոդելի ձևավորման փնտրտուք կա»,- «Առաջին լրատվականի» հետ զրույցում կարծիք հայտնեց քաղաքագետ Երվանդ Բոզոյանը` անդրադառնալով այն հարցին, թե ինչքանով է հնարավոր արաբական աշխարհում տեղի ունեցող իրադարձությունների կրնկնությունը մեր տարածաշրջանում:
Ըստ քաղաքագետի` արաբական աշխարհի դեպքերը չեն կարող կրկնվել Իրանում և Թուրքիայում, քանզի դրանք անձակենտրոն համակարգեր չեն և բավականին կայուն են. «Ինչ վերաբերում է Ադրբեջանին, ապա այն ավելի շատ հետխորհրդային երկիր է, քան թե մահմեդական, այդ իսկ պատճառով Ադրբեջանի վրա ավելի շատ կազդեն այն պրոցեսները, որոնք կարող են տեղի ունենալ ԱՊՀ կամ միջինասիական երկրներում: Արաբական երկրներում տեղի ունեցող դեպքերը, ըստ Բոզոյանի, մեր տարածաշրջանի վրա կարող են ավելի շատ ֆոնային ազդեցություն ունենալ»:
Բոզոյանի գնահատմամբ, նույն իրավիճակն է նաև Հայաստանում: Սակայն, միևնույն ժամանակ, մեր երկրում կա յուրահատուկ իրավիճակ` հաշվի առնելով սոցիալ-տնտեսական խնդիրները. «Վերջին երկու-երեք տարիների ընթացքում, հատկապես կառավարության «բարեփոխումների» արդյունքում տասնյակ հազարավոր մարդիկ մնացին անգործ, ինչն էլ առաջացրեց այնպիսի սոցիալական լարվածություն, որն ըստ էության կարելի է սոցիալական երկրաշարժ անվանել»:
Բոզոյանը նշեց, որ եթե երկիրը լավ վիճակի մեջ լիներ, ապա կարելի էր լուծել փողոցային առևտրի կամ վրացական պետհամարանիշերի հարցը, սակայն այս ծանր պայմաններում, կառավարության քայլերն առաջացնում են սոցիալական պայթունավտանգ իրավիճակ: