ԱՄՆ Կոնգրեսի միջանկյալ ընտրություններում, ինչպես հայտնի է, զգալի առավելության են հասել հանրապետականները: Թուրքական մամուլը ոգեւորությամբ է տեղեկացնում հանրապետականների հաջող ընտրական արդյունքների մասին: Մասնավորապես, Ներկայացուցիչների պալատում վերջիններս մեծամասնություն են կազմել եւ պալատի նախագահությունը ստանձնել դեմոկրատներից: Ենթադրվում է, որ Ներկայացուցիչների պալատի նախագահ, Հայոց ցեղասպանության բանաձեւի եռանդուն աջակիցներից Նենսի Փելոսիին այդ պաշտոնում փոխարինելու կգա հանրապետական Ջոն Բոեհներգելը, որը հայտնի է իր ոչ հայանպաստ գործունեությամբ: Թուրքական Radikal-ը նշում է, որ թուրքերի համար ուրախալի վերոնշյալ հանգամանքը, միեւնույն ժամանակ, դրականից բացի, ունի նաեւ իր բացասական կողմը: Օրինակ՝ Բոեհներգելը թեեւ հայկական բանաձեւերի հարցում թուրքամետ դիրքորոշմամբ է աչքի ընկնում, բայց նա նաեւ շատ զգայուն է Իրանի ու Իսրայելի հետ կապված հարցերում: Եվ առհասարակ, հանրապետականներն Իրանի հանդեպ ընդգծված թշնամանք, իսկ Իսրայելին անվերապահ աջակցություն են ցուցաբերում: Սա արդեն դժվար կացության մեջ է դնում Անկարային, որը վատ հարաբերություններ ունի Թել Ավիվի եւ ջերմ հարաբերություններ` Թեհրանի հետ:
