Երևան կատարած այցի ընթացքում իր պատվին տված պաշտոնական ընթրիքի ժամանակ Շվեյցարիայի նախագահ Միշելին Կալմի-Ռեյը հայտարարել է, որ իր համար պատիվ կլինի մայիսի սկզբին Շվեյցարիայում ընդունել պաշտոնական այց կատարած Սերժ Սարգսյանին:
Փաստորեն, հայ-շվեյցարական հարաբերությունները ջերմացել են այնքան, որ նախագահները ամիսը մեկ իրար են այցելում: Այդ ի՞նչ կարևոր գործեր կան, որ Սերժ Սարգսյանը Միշելին Կալմի-Ռեյի Երևան կատարած այցից մեկ ամիս անց այցելելու է Շվեյցարիա: Ի՞նչ են կողմերը կիսատ թողել Երևանում, որ այդքան շտապ շարունակելու կարիք է զգացվելու:
Ըստ ամենայնի, Սերժ Սարգսյանը կամաց-կամաց փորձում է հայ-թուրքական ֆուտբոլը վերսկսել` Շվեյցարիայի հետ նախավարժանքով: Չէ՞ որ Շվեյցարիան հայ-թուրքական գործընթացի միջնորդն էր: Իսկ մենք գիտենք, որ այդ գործընթացում շատ կարևոր ամիս է ապրիլը: Եվ ի՞նչ է սպասվում ապրիլին, ի՞նչ է լինելու այդ ամսին, որ Շվեյցարիայի նախագահը ապրիլից առաջ Երևան է գալիս, իսկ ապրիլից անմիջապես հետո էլ Շվեյցարիա է մեկնելու Հայաստանի նախագահը:
Ըստ երևույթին, Միշելին Կալմի-Ռեյը Երևանում Հայաստանի իշխանությանն ապրիլյան վարքագծի ցուցումներ է տվել, իսկ մայիսին էլ Շվեյցարիայում քննություն է ընդունելու կամ միանգամից գնահատական է նշանակելու: Սակայն չի բացառվում նաև, որ հայ-շվեյցարական «սիրավեպը» թելադրված է ֆինանսական խնդիրներով, որ շվեյցարական բանկերում առաջացել են Հայաստանի տարբեր պաշտոնյաների համար:
Երևի թե որևէ մեկի մոտ կասկած չկա, որ մեր պաշտոնյաները, և առաջին հերթին բարձրաստիճան պաշտոնյաները, ու նաև օլիգարխները հաշիվներ կունենան շվեյցարական բանկերում: Ըստ երևույթին, այդ հաշիվների հետ կապված խնդիրներ են ծագել, ինչն էլ ստիպում է Սերժ Սարգսյանին մեկ ամիս անց նորից հանդիպել Շվեյցարիայի իշխանության հետ և Երևանում ստացած ինչ-որ հարցերի պատասխան տալ:
Սակայն, միանգամայն հնարավոր է նաև, որ հայ-շվեյցարական սերտ փոխայցելությունները իրականում չունեն գլոբալ կամ խորը շարժառիթներ, այլ պարզապես եզրափակիչ փուլ է մտել Շվեյցարիայում օգտագործած ճոպանուղիները Հայաստան բերելու հարցը, ինչի մասին ամիսներ առաջ խոսել էր էկոնոմիկայի նախկին նախարար Ներսես Երիցյանը:
Ճիշտ է, նա հիմա այլևս նախարար չէ, բայց նրա ինտելեկտն ու գիտելիքները շարունակում են ծառայել Հայաստանի իշխանությանը, կամ Հայաստանի իշխանությունը շարունակում է ծառայել նրա ինտելեկտին ու գիտելիքներին: Կարևոր չէ, կարևորը, որ շուտով Հայաստանը կստանա օգտագործած ճոպանուղիների առաջին խմբաքանակը, և եթե հանկարծ հաջողվի հայ-շվեյցարական բարձր մակարդակի բանակցությունների արդյունքում համաձայնության գալ, որ օգտագործած ճոպանուղիները շվեյցարացիները մեզ են հանձնելու նրանց վրա նստած զբոսաշրջիկների հետ միասին, ապա կարելի է մեզ բոլորիս շնորհավորել Հայաստանի՝ տարածաշրջանային տուրիստական կենտրոն դառնալու կապակցությամբ: