«Վեցյակի» հետ Իրանի բանակցությունները կարող են վերսկսվել նոյեմբերի 10-ին կամ 15-ին Վիեննայում, Ստամբուլում կամ Ժնեւում: Այդ մասին այսօր հաղորդել Է IRNA գործակալությունը՝ վկայակոչելով Իրանի արտաքին գործերի նախարար Մանուչեհր Մոթաքիին: «Եվրամիությունն առաջարկել Է բանակցություններն անցկացնել նոյեմբերի 15-ին, մենք ավելի վաղ առաջարկում էինք նոյեմբերի 10-ը: Հանդիպման անցկացման վայրերի թվում, Ժնեւից բացի, առաջարկվել են Վիեննան եւ Ստամբուլը, բայց դրա շուրջ վերջնական պայմանավորվածություն դեռեւս չկա»,-ասել Է Մոթաքին, որը երկօրյա այցով գտնվում Է Վրաստանում: Ավելի վաղ ՌԴ-ի արտաքին գործերի նախարար Սերգեյ Լավրովը հայտարարել Է, թե Ռուսաստանն ակնկալում Է, որ Թեհրանը նոյեմբերի կեսին կվերադառնա միջուկային ծրագրի վերաբերյալ բանակցությունների սեղանի շուրջ: «Մենք Իրանի պատասխանն ենք ակնկալում այն առաջարկներին, որ արվել են միջազգային միջնորդների ամբողջ խմբի կողմից: Այդ առաջարկները հայտնի են, դրանք կան թղթի վրա, եւ իրանցիները դրանք ունեն: Մենք լսել ենք, որ Իրանը շահագրգռված Է այդ բանակցություններին վերադառնալու նոյեմբերի կեսին: Հուսանք, որ այդպես Էլ կլինի»,-ասել Է Լավրովը: Նա հիշեցրել Է, որ արդեն ավելի քան մեկ տարի Է անցել այն ժամանակվանից, երբ սկզբունքային պայմանավորվածություն ձեռք բերվեց այն մասին, որ կողմերին անհրաժեշտ Է վերադառնալ բանակցությունների սեղանի շուրջ: «Լավ Է ուշ, քան երբեք»,-նշել Է նախարարը:
