Համալսարանական կրթությամբ կանանց ասոցիացիայի 15-ամյակին նվիրված համաժողովին ներկա էր նաև ԵԱՀԿ երևանյան գրասենյակի ղեկավարի տեղակալ Քարել Հովսթրան, որն ասաց, որ ԵԱՀԿ և ԺՀՄԻԳ երևանյան գրասենյակները սերտ համագործակցել են ասոցիացիայի հետ, միասին իրականացրել մի շարք ծրագրեր և դարձել են վստահելի գործընկերներ: Հոֆստրան նշեց, որ ԵԱՀԿ-ն կարևորում է այն հարուստ փորձագիտական բազան, որը ստեղծվել է ասոցիացիայի ջանքերով, և ողջունում է այն առաջարկությունները, որոնք ներկայացվել են գործադիր և օրենսդիր մարմիններին ոլորտում բարեփոխումներ իրականացնելու համար:
«Գենդերային ոլորտում հաջողություններ արձանագրելու համար նախ անհրաժեշտ է, որ իշխանությունները, քաղաքական կուսակցությունները, ԶԼՄ-ները և միջազգային կազմակերպությունները համատեղեն իրենց ջանքերն ու համակարգեն քայլերը: Հայաստանում ունենք գենդերային հավասարության ամրապնդման կարիք, մասնավորապես կանանց քաղաքական մասնակցության ակտիվացման անհրաժեշտություն»,- ընդգծեց Հոֆստրան:
Ի դեպ, Քարել Հոֆստրան իր ելույթը ներկայացրեց հայերեն:
Համաժողովին մասնակցում էր նաև ՀՀ աշխատանքի և սոցիալական հարցերի փոխնախարար Ֆիլարետ Բիրիկյանը, որը կարևորեց ասոցիացիայի դերը Հայաստանում գենդերային հարցերի լուծման հարցում. «Կազմակերպությունը անցած տարիների ընթացքում մեծ ներդրում է ունեցել մարդու իրավունքների պաշտպանության, մասնավորապես գենդերային քաղաքականության ներդրման գործում: Կառավարությունն ընդունել է գենդերային հայեցակարգը, որի մշակման մեջ շատ լուրջ ներդրում ուներ այս ասոցիացիան: Չափազանց կարևոր է կանանց մասնակցությունը երկրի քաղաքական գործընթացներին»: