Այս տարի սեպտեմբերին Հայաստանում Հյուսիս-Հարավ ավտոմայրուղու շինարարությունը հանդիսավորությամբ մեկնարկեց Երևան-Արարատ մայրուղու շինարարության հիմնարկեքով: «Հյուսիս-Հարավ ճանապարհային միջանցքի ներդրումային ծրագրի կազմակերպություն» ՊՈԱԿ-ի գործադիր տնօրեն Արա Հովսեփյանը հայտարարեց, որ այն կապահովի Իրանից դեպի վրացական նավահանգիստներ և հակառակ ուղղությամբ ամենակարճ երթուղին:
Թե որքանով է այս մայրուղին հետաքրքիր Վրաստանի գործարարների համար, «Առաջին լրատվական»-ը փորձեց պարզել Վրաստանի բեռառաքողների միության ղեկավար Իրակլի Շենգելիայից: «Ինչքան շատ լինեն ենթակառուցվածքները, այնքան լավ: Սակայն թե տնտեսապես որքան շահավետ կլինի այդ ճանապարհը, դա հետագայում պարզ կլինի»,- ասաց նա:
Ի. Շենգելիան ընդգծեց, որ Վրաստանն ակտիվ համագործակցում է տարածաշրջանի բոլոր երկրների հետ, այդ թվում՝ Իրանի:
Նշենք, որ Վրաստան-Իրան առևտրաշրջանառությունը տարեցտարի մեծանում է: Այսպես, 2011 թ. այն կազմել է 81 մլն դոլար, 2010-ին՝ 70 մլն դոլար, 2009-ին ճգնաժամի պատճառով կտրուկ անկում է ապրել, իսկ 2008-ին՝ 62 մլն դոլար:
Հիշեցնենք, որ բետոնե ծածկույթով արագընթաց մայրուղին ձգվելու է Հայաստանի և Իրանի սահմանից` Մեղրիից մինչև Հայաստանի և Վրաստանի սահմանային Բավրա անցակետը, և ունենալու է 556 կմ երկարություն: Այս նախագծի արժեքը 962 մլն դոլար է, որից 500 միլիոնը, որպես վարկ, տրամադրում է Ասիական զարգացման բանկը:
