Քաղաքական և ընտրական տեխնոլոգիաների փորձագետ Արմեն Բադալյանի կարծիքով՝ քաղաքական ցանկացած գործիչ իրավունք ունի սկսելու քաղաքական ցանկացած գործընթաց, սակայն մինչ սկսելը պետք է մի քանի կետեր հաշվի առնի:
«Նախագահին իմպիչմենտ հայտարարելն այնպիսի գործընթաց է, որի համար անհրաժեշտ են համապատասխան իրավական ուղղություններ: Մինչ դա նախաձեռնելը Փաշինյանը պետք է հաշվի առնի՝ արդյո՞ք այդ գործընթացը գոնե 50 տոկոսից ավելի հնարավորություն ունի հաջողություն ունենալու համար, թե ոչ»,- ասաց նա «Առաջին լրատվական»-ի հետ զրույցում՝ անդրադառնալով ընդդիմադիր պատգամավոր Նիկոլ Փաշինյանի՝ Սերժ Սարգսյանին պաշտոնանկ անելու նախաձեռնությանը:
Բադալյանի խոսքերով՝ եթե քաղաքական գործընթացը կարող է հաջողության հասնել գոնե 51 տոկոսի դեպքում, ապա այդ գործընթացը պետք է լինի․ «Իսկ եթե այդ քաղաքական գործընթացն արդեն նախապես գիտենք, որ տապալվելու է, կասկածելի է դառնում այդ քաղաքական գործընթացը սկսելու իմաստը. պարտությունը տվյալ քաղաքական գործչի իմիջի վրա է ազդելու»,- ընդգծեց փորձագետը:
Մեր այն դիտարկմանը, թե սա գուցե արվում է ոչ իշխանականների անկեղծությունը ստուգելու համար, մեր զրուցակիցը պատասխանեց․ «Եթե քաղաքական գործընթացը նպատակ ունի այս կամ այն քաղաքական ուժին վարկաբեկել կամ այլ քաղաքական ուժի իմիջին վնաս հասցնել, ապա պետք է հաշվարկ անել, թե տվյալ քաղաքական գործիչը ինչ վարկանիշ ունի եռյակի կողմնակցիների մոտ: Մենք կարող ենք ասել, որ տվյալ քաղաքական գործիչը՝ Նիկոլ Փաշինյանը, եռյակի կողմնակիցների մոտ չունի այն հավասարազոր վարկանիշը, որպեսզի կարողանա այդ հարցում դեպի իրեն բերել: Եռյակին վստահող զանգվածը, նրան հարող լրատվամիջոցները ցույց են տալիս, որ բացասական վերաբերմունք ունեն այդ քաղաքական գործչի հանդեպ»:
Արմեն Բադալյանի դիտարկմամբ՝ այս ամենից եռյակի վարկանիշն էականորեն չի տուժի նրա համակիրների մոտ, որովհետև նախաձեռնությամբ հանդես է գալիս մի գործիչ, որն այնտեղ վարկանիշ չունի․ «Սա կլինի կարճաժամկետ գործընթաց և վերջ: Իսկ եթե արվում է ապագայի համար, այսինքն՝ հերթական ընտրություններում առաջադրվելու, ապա նորից հաջողություն չի ունենա, որովհետև ՀՀ նախագահի հարցը ոչ թե Հայաստանի հասարակության կողմից է որոշվում, այլ դրսում, իսկ դրսում Հայաստանում իմպիչմենտ հայտարարելու հարցին լուրջ չեն նայում»:
Նրա դիտարկմամբ՝ այս նախաձեռնությունը Փաշինյանի համար ունի ՊՌ նշանակություն․ «Քաղաքական գործընթացն ինքնին ունի ՊՌ բաղկացուցիչ, սակայն եթե քո ամբողջ նպատակը հենց այդ ՊՌ-ն է դառնում, այդ քաղաքական գործընթացը ոչ մի արդյունք՝ բացի բացասականից չի տալիս»:
Բացի այդ, ըստ Արմեն Բադալյանի, եթե եռյակը միանա Փաշինյանի նախաձեռնությանը, ապա կհակասի Ազատության հրապարակում տված իր խոստումներին, որ միշտ հաջողության է հասնելու․ «Ակնհայտ է, որ անհրաժեշտ թվով ստորագրություններ չեն հավաքվելու, անգամ եթե եռյակի բոլոր պատգամավորները միանան, իսկ պարտության պիտակն այդ դեպքում կմնա նաև եռյակի վրա»:
Ամփոփելով՝ Արմեն Բադալյանն ընդգծեց, որ չհաջողելու դեպքում միայն Փաշինյանն է վնաս կրելու: Ըստ նրա՝ սա ի սկզբանե չհաշվարկված գործընթաց էր:
