Երեկ Հայաստանում վերջապես համալրվել է փոխվարչապետի պաշտոնը, և այն զբաղեցրել է նոր նախարար՝ միջազգային տնտեսական ինտեգրացիայի և բարեփոխումների նախարար Վաչե Գաբրիելյանը:
Վաչե Գաբրիելյանը նախարար էր Տիգրան Սարգսյանի կաբինետում, իսկ Հովիկ Աբրահամյանի վարչապետ նշանակվելուց հետո նշանակվեց վարչապետի խորհրդական, որը, ինչ խոսք, մխիթարական պաշտոն էր: Եվ ահա, Գաբրիելյանը վերստին նախարար է և արդեն փոխվարչապետ, ինչը ստատուսի շոշափելի բարձրացում է:
Ըստ էության, տեղի են ունենում մի շարք փոփոխություններ: Նախ՝ փոխվարչապետի կարգավիճակը տարածքային կառավարման նախարարությունից արդեն անցնում է նոր ստեղծված միջազգային տնտեսական ինտեգրացիայի և բարեփոխումների նախարարությանը: Սրանից զատ՝ բավական ծանրակշիռ կարգավիճակով կառավարությունում վերականգնվում է Տիգրան Սարգսյանի թիմակից համարվող Վաչե Գաբրիելյանը, որը Սարգսյանի հետ երկար տարիներ աշխատել է Կենտրոնական բանկի նախագահի տեղակալի պաշտոնում, իսկ հետո՝ կառավարությունում:
Ըստ էության, սա Տիգրան Սարգսյանի հեռակա ռևանշ է գործադիր իշխանությունում, որի միջոցով Սերժ Սարգսյանը փորձում է կառավարությունում Հովիկ Աբրահամյանին առնել յուրօրինակ աքցանի մեջ:
Իհարկե պարզ չէ, թե ինչ է անելու Վաչե Գաբրիելյանը որպես նախարար: Եթե միջազգային ինտեգրացիան վերաբերում է Եվրասիական միությունից դուրս գտնվող տարածքներին, ապա այստեղ, իհարկե, շատ բան անորոշ է, որովհետև հայտնի չէ, թե Ռուսաստանն ինչ հնարավորություններ է թույլ տալու Հայաստանին երրորդ երկրների հետ հարաբերություններում, և ինչքանով են երրորդ երկրները շահագրգռված լինելու Հայաստանի հետ գործնական ինտեգրացիայում: Եթե նոր նախարարության գործը ԵՏՄ-ում Հայաստանի ինտեգրացիան է լինելու, ապա այստեղ էլ մենք տեսնում ենք, թե ինչ գզվռտոց է ԵՏՄ-ում Բելառուսի, Ռուսաստանի ու Ղազախստանի միջև, և այս պայմաններում կնշանակի, որ Հայաստանը պատրաստվում է գզվռտոցին ինտեգրացվել:
Կատակը՝ կատակ, իհարկե, սակայն պարզ չէ՝ ինչ է ԵՏՄ-ն, և հետևաբար անորոշ է նաև, թե այս դեպքում ինչ ինտեգրացիայի մասին կարող է խոսք լինել: Նոր նախարարությունը հավանաբար ստեղծվել է, այսպես ասած, համենայն դեպս, հետագայում պետք գալու համար:
Սա՝ արտաքին մասով: Ներքին մասով այն, իհարկե, միշտ էլ պետք կգա, այսինքն՝ ներքին մասով ավելորդ պաշտոն երբեք չի լինում: Նոր պորտֆելը գալիք խորհրդարանական ընտրություններում կընդլայնի իշխանական կարկանդակը:
Լուսանկարը` PanARMENIAN Photo-ի