Նոյեմբերի 4-ին Ն.Ս.Օ.Տ.Տ. Գարեգին Բ Ամենայն Հայոց Կաթողիկոս և Ծայրագույն Պատրիարքն ընդունեց Արաբական Միացյալ Էմիրությունների արտաքին առևտրի նախարար Շեյխա Լուբնա ալ-Քասիմիի գլխավորած պատվիրակությանը` ԱՄԷ-ում ՀՀ դեսպան Վահագն Մելիքյանի ուղեկցությամբ։
Նորին Սրբությունը ողջունեց տիկին նախարարին եւ պատվիրակության անդամներին` ուրախություն հայտնելով Հայաստանի և Արաբական Միացյալ Էմիրությունների միջև խորացող ջերմ ու եղբայրական հարաբերությունների, երկու ժողովուրդների բարեկամական կապերի առնչությամբ:
Վեհափառ Հայրապետն իր ջերմ ողջույնները փոխանցեց նաև Արաբական Միացյալ Էմիրությունների Շարժայի կառավարիչ Շեյխ Սուլթան բին Մուհամմադ Ալ Քասեմիին, ում հովանավորությամբ վերանորոգվում է Հայաստանի նշանավոր միջնադարյան վանքերից մեկը` Հաղարծինը։
ՙՄեր օրհնություններն ենք բերում ձեր առաքելությանը և մաղթում հաջողություններ: Թող Աստված պահի պահպանի խաղաղության մեջ Արաբական Միացյալ Էմիրությունները, աստվածասեր նրա ժողովրդին և բարեկամությունը երկու երկրների՚, – իր խոսքում նշեց Նորին Սրբությունը:
Հանդիպման ավարտին հյուրերն այցելեցին Մայր Աթոռ Սբ. Էջմիածնի թանգարան և ծանոթացան հայ հոգևոր մշակույթի գանձերին: