ՀՀ գլխավոր դատախազության ՀԿԳՔ վարչության որոշմամբ վերացվել է «Ա1+» հեռուստաընկերության լրագրող Մարինե Խաչատրյանի մասնագիտական գործունեությունը խոչընդոտելու կապակցությամբ հարուցված քրեական գործը կարճելու մասին ՀՔԾ որոշումը և գործը կրկին վերադարձվել է ՀՔԾ նոր նախաքննություն իրականացնելու համար:
Հիշեցնենք, որ այս քրեական գործը հարուցվել էր լրագրողի և ԱԺ անվտանգության ծառայության պետ Կարեն Հայրապետյանի միջև տեղի ունեցած բախումից հետո, երբ ծառայության պետը խոչընդոտել էր լրագրողի աշխատանքը, հարվածել նրա ձեռքին և ցած գցել լրագրողի IPad-ը: Դեպքից հետո քրեական գործ հարուցվեց, սակայն քննությունից հետո ՀՔԾ-ն կարճեց գործը: Բայց այսօր գլխավոր դատախազությունը գտել է, որ գործը կարճելու հիմքերը բացակայում են: ՀՔԾ-ն նախաքնությունն իրականացրել է դատավարական կոպիտ խախտումներով, մասնավորապես, անձին` Մարինե Խաչատրյանին տուժող ճանաչելու համար բավարար հիմքերի առկայության պայմաններում վերջինիս տուժող չի ճանաչել, ինչի հետևանքով լրագրողը զրկել է ՀՀ քրեական դատավարության օրենսգրքի 59-րդ և 247-րդ հոդվածներով նախատեսված իրավունքներից օգտվելու հնարավորությունից:
ՀՀ դատախազությունը քրեական գործը վերադարձրել է ՀՔԾ՝ նախաքննություն իրականացնելու համար և հանձնարարել վարույթն իրականացնող մարմնին Մարինե Խաչատրյանին ճանաչել քրեական գործով տուժող:
Սա, իհարկե, ողջունելի քայլ է գլխավոր դատախազության, մասնավորապես՝ Գևորգ Կոստանյանի կողմից, եթե հաշվի չառնենք, թե դա ինչ նպատակով է արվել: Այս որոշումն ամբողջությամբ տեղավորվում է Կոստանյանի՝ այլ ուժային կառույցների ղեկավարների հետ ունեցած հակասությունների մեջ: Այսպիսի մի դրսևորման մենք ականատես եղանք վերջերս, երբ Աղվան Հովսեփյանը հայտարարեց, թե մարտի 1-ի գործը բացահայտված է, որից անմիջապես հետո Գևորգ Կոստանյանն իր մոտ հրավիրեց զոհերի հարազատներին և հայտարարեց, որ այսուհետ գործերը քննվելու են առանձին վարույթներով:
Լրագրողի գործի դեպքում իրավապաշտպանները նույն ձեռագիրն են տեսնում: «Այն, որ գլխավոր դատախազության եւ ՀՔԾ-ի, ինչպես նաև քննչական կոմիտեի միջև հակասություններն անձնական են, դրանում կասկած չունեմ: Բայց արդյո՞ք այդ հակասությունները այն մակարդակին են, որ իրավական հարթությունում կարող են գործել: Չեմ կարծում, որ այդ անձինք այնքան անկախ են, որ իրենց հակասությունները կարող են բերել գերատեսչական պայքարի, այսինքն՝ մեկը արդարություն պահանջի, իսկ մյուսը, թեկուզ ձևական, դեմ լինի դրան: Իմ կարծիքով, այս ամեն ինչը համաձայնեցված է քաղաքական իշխանության հետ»,- «Առաջին լրատվական»-ի հետ զրույցում ասաց «Հելսինկյան» կոմիտեի նախագահ Ավետիք Իշխանյանը:
Վերջինիս խոսքով՝ այդ ցուցադրական հակասությունների արդյունքներն առանձնապես ոգևորիչ չեն լինելու: Շատ արագ կպարզվի, որ նույն մարտի 1-ի գործով ոչ մի բան չի պարզվի, և գործն այդպես էլ քնած կմնա, ինչպես եղել է: Հոկտեմբերի 27-ի գործից անջատված մասն էլ այդպես կմնա, և ոչ մի բան չի պարզվի: «Որևէ արդյունքի ես չեմ սպասում: Ասեմ ավելին, որ արդյունքի չեմ սպասում նաև հնարավոր իշխանափոխության դեպքում, քանի որ այսօրվա քաղաքական ուժերի մոտ ես չեմ տեսնում այդ պատրաստակամությունը՝ բացահայտելու ադ գործերը: Այնպես որ կրկնեմ, որ, այո, ուժային կառույցների ղեկավարների մեջ իսկապես կա հակասություն, բայց այդ հակասությունը ինքնուրույն չէ և չի կարող արտահայտվել իրավական դաշտում»,- նկատեց իրավապաշտպանը:
