Արագածոտնի մարզի ընդհանուր իրավասության դատարանում Ռուզաննա Բարսեղյանի նախագահությամբ սկսվում է Հայկանուշ Գրիգորյանի գործի դատական քննությունը:
Ըստ մեղադրանքի՝ 55-ամյա երևանցի Հայկանուշ Գրիգորյանը Արագածոտնի մարզի Ղազարավան համայնքի բնակչուհի Թ. Ս.-ից առուծախի պայմանագրով, սեփականության իրավունքի վկայականով նույն համայնքի վարչական տարածքում գտնվող, պետության կողմից պահպանվող «Ղազարավանի քաղաքատեղի» պատմամշակութային հուշարձանի տարածքին հարակից վայրում ձեռք է բերել 1 հա հողատարածք:
Այդ տեղում մատուռ կառուցելու նպատակով, ըստ մեղադրանքի, Հայկանուշ Գրիգորյանը 2012 թվականի հունիսի 20-ին դիմել է Ղազարավան համայնքի ղեկավար Հ. Ասատարյանին, ստացել է շինարարության թույլտվություն:
Մատուռ կառուցելու պատրվակով Հայկանուշը իր սեփականությունը հանդիսացող հողատարածքից դուրս՝ պատմամշակութային հուշարձանի տարածքում, ծանր տեխնիկայի միջոցով 2012 թվականի ամռան ամիսներին առանց որևէ խոչընդոտի կատարել է քանդման աշխատանքներ՝ մշակութային առանձնակի արժեք ունեցող «Ղազարավանի քաղաքատեղի» հանրապետական նշանակության հուշարձանի տարածքում ավերելով ու վնասելով մշակութային շերտեր և կառույցների մնացորդներ:
Մեր երկրում մշակութային հուշարձանների պահպանության ողբալի վիճակը փաստող այս դեպքով ամբաստանյալը մեկն է՝ Հայկանուշ Գրիգորյանը: Մշակութային հուշարձանի՝ ամիսներ տևած քանդման ու ավերման համար, երևի, այլ պատասխանատուներ չկան:
«Պատմամշակութային արգելոց-թանգարանների և պատմական միջավայրի պահպանության ծառայությունը» տուժողի կարգավիճակ ունի:
Ոչ ոք մատուռակառուցման «աստվածահաճո» գործին հանցավոր եղանակով լծված Հայկանուշ Գրիգորյանի ձեռքը ժամանակին չի բռնել: Ավերման փաստից հետո են սթափվել պատկան մարմինները, ծանր տեխնիկան միայն անվերականգնելի վնասներ հասցնելուց հետո է «նկատվել»:
Հայկանուշ Գրիգորյանին մեղադրանք է առաջադրվել ՀՀ քրեական օրենսգրքի 264 հոդվածի 2-րդ մասով:
Նրա խափանման միջոցը ստորագրությունն է չհեռանալու մասին:
