Լիբիայի կառավարական ուժերը մոտ ժամանակներս պատրաստվում են կոտրել ռազմական գործողությունների ընթացքն իրենց օգտին: Դրա համար նրանք պատրաստվում են երկրի ներսում վերացնել կոալիցիայի ավիացիայի ռազմական հարձակման վտանգը և գրավել ՆԱՏՕ-ի բազաները Իտալիայի Սիցիլիա կղզում: Այս մասին հաղորդում է RBC-ն:
Ինչպես հաղորդում են արևմտյան ԶԼՄ-ները, կառավարական բանակն արդեն ցուցադրել է, թե ինչպես կարող է փոխել մարտավարությունը` կախված ստեղծված իրավիճակից, և փորձելու է օգտվել 1943 թ. Երկրորդ աշխարհամարտի ժամանակ դաշնակիցների իրականացրած գործողություններից ` տեղափոխվելով Հյուսիսային Աֆրիկայից Իտալիա:
Քանի որ ՆԱՏՕ-ն նախատեսել էր, որ լիբիական ռազմանավերը կարող են գրոհել Սիցիլիայի վրա, Լիբիայի ռազմական նավերը նախապես վերացվել էին: Քադաֆիի կողմնակիցները պատրաստվում են իբրև փախստականներ տեղափոխվել իտալական կղզիներ` սկզբում գրավելով Լամպեդուզա կղզին, որտեղ վերջին օրերին մի քանի հազար մարդ է տեղափոխվել: Տեղի բնակչությանը լիբիացի փախստականներն ադրդեն գերազանցում են մի քանի անգամ: Այս գաղտնի գործողության սկիզբը նշանակված է ապրիլի 1-ին: Իսկ Լամպեդուզայից շատ մոտ է Սիցիլիան և Սիգոնելլո բազան, որտեղից ՆԱՏՕ-ի ինքնաթիռները հարձակումներ են գործում քադաֆիական ուժերի վրա:
Ենթադրվում է, որ գործողության հաջող ընթացքի համար լիբիական բանակը կմիավորվի իտալական ընդդիմության հետ և կշարժվի դեպի Հռոմ` Սիլվիո Բեռլուսկոնիի կառավարությունը տապալելու համար, իսկ հետո կշարժվի Փարիզ, որտեղ շատ մարդիկ դժգոհ են Սարկոզիից: Ոչ պաշտոնական տեղեկություններով, Ֆրանսիայում ժամանակավոր կառավարությունը կգլխավորի Ժան Մարի Լե Պենը:
Ռուսաստանում դեռ չեն մեկնաբանում, թե արդյոք պատրաստվում են քաղաքական ապաստարան տրամադրել Սիլվիո Բեռլուսկոնիին: Որոշ տվյալներով, դեպքերի այդպիսի զարգացման դեպքում ՄԱԿ-ի Անվտանգության խորհուրդը պատրաստվում է քննարկել Եվրամիության օդային տարածքը փակելու հարցը: