«Առաջին լրատվական»-ի զրուցակիցն է «Ազատ դեմոկրատներ» կուսակցության նախագահ, ԱԺ պատգամավոր Խաչատուր Քոքոբելյանը:
-Պարոն Քոքոբելյան, 2015-ին Ռուսաստանը հնարավոր է՝ լքի ԵԽԽՎ-ն: Սա ի՞նչ ազդեցություն կունենա Հայաստանի՝ ԵՏՄ անդամակցությունից հետո: Դուք վտանգներ տեսնո՞ւմ եք:
-Վտանգներ չի կարելի չտեսնել: Իհարկե, ես այն կարծիքին եմ, որ Ռուսաստանն ինքը կկարողանա կշռել և չհրաժարվել այնպիսի կարևորագույն կառույցից, ինչպիսին ԵԽԽՎ-ն է: Ցավոք, եթե դիտարկենք Հայաստանի քվերակությունները միջազգային կազմակերպություններում, այդ թվում՝ Ղրիմի քվեարկության հետ կապված, ապա շատ տեսանելի է դառնում, որ Ռուսաստանի ազդեցությունը ոչ միայն քվերակության առումով, այլ նաև ընդհանուր վարքագծի, ինչու չէ, նաև դրիքորոշումների հստակեցման հետ կապված, ուղղակի ակնհայտ է: Ակնհայտ է, որ Հայաստանի շահերից չէր բխում ՄԱԿ-ում քվեարկությունը, մասնավորապես՝ Ղրիմի հարցով, Հայաստանը ընկրկեց և, ցավոք, քվեարկեց:
Եթե հիշում եք, մինչև քվեարկության պահը կիսապաշտոնական տեսակերտներ հայտնվեցին, որ Հայաստանը ձեռնպահ կքվեարկի, բայց հետո դա հերքվեց, և Հայաստանը քվեարկեց այնպես, ինչպես քվեարկեց Ռուսաստանի շուրջ համախմբված փոքրամասնությունը: Եվ ես հույս ունեմ, որ պրոցեսներն այդ աստիճանի չեն զարգանա, որ ռուսական կողմից այդ կարգի ճնշումների անհրաժեշտություն չի լինի Հայաստանի իշխանությունների վրա, բայց եթե եղան ճնշումներ, ցավոք, ես վստահ եմ, որ այնպիսի վարքագիծ կդրսևորվի, ինչպիսին կպահանջվի Ռուսաստանի կողմից:
Այս գործողությունները մի վիճակի են բերում, որ Հայաստանը կորցնում է իր ինքնուրույն գործելու հնարավորությունը, և, դժբախտաբար, միջազգային հանրության կողմից շատ-շատ խնդիրների հետ կապված՝ Հայաստանը չի ընկալվում որպես ինքնուրույն խաղացող, այլ համարվում է միջազգային հարթակներում ռուսական քաղաքականության սպասարկող:
Ավելին՝ տեսանյութում:
