Կոտայքի մարզի ընդհանուր իրավասության դատարանում Յուրի Բաղդասարյանի նախագահությամբ սկսվում է Հայկ Իխտիարյանի գործի դատական քննությունը:
Ըստ մեղադրանքի՝ 40-ամյա Հայկ Իխտիարյանը 2014 թվականի օգոստոսի 27-ին, ժամը 14-ի սահմաններում Կոտայքի մարզի ընդհանուր իրավասության դատարանի Եղվարդի նստավայրի դիմաց, Անդրեաս Մելքոնյանի գործի դատական քննության հետ կապված, «ցավագին ընդունելով Փաստաբանների պալատի փաստաբան Վարդան Ասատրյանի կողմից իր պաշտպանյալի՝ Անդրեաս Մելքոնյանի շահերի պաշտպանությունն իրականացնելու հանգամանքը, յուղի տեսքով ձևափոխված նավթամթերք է լցրել փաստաբանի դեմքին և հագուստներին՝ հրապարակայնորեն սպառնալով վերջինիս առողջությանը վնաս պատճառել՝ հրկիզել:
Հայկ Իխտիարյանին մեղադրանք է առաջադրվել ՀՀ քրեական օրենսգրքի 347 հոդվածի 2-րդ մասով:
Հայկ Իխտիարյանը Անդրեաս Մելքոնյանի կողմից վրաերթի ենթարկված ու առողջության ծանր վնաս ստացած անչափահասի օրինական ներկայացուցիչն է՝ հայրը: Նա վրդովված է եղել այդ վրաերթը կատարած Անդրեաս Մելքոնյանի՝ դատարանում իրականացված պաշտպանությունից ու դիմել է ծայրահեղ, հանցավոր քայլի: Նրա զայրույթն ուղղվել է մասնագիտական պարտքը կատարող փաստաբանի դեմ՝ ասես ի դեմս նրա տեսնելով իր որդուն ալկոհոլ օգտագործած վիճակում վրաերթի ենթարկած վարորդի հնարավոր անպատժելիությունը:
Անդրեաս Մելքոնյանն անպատիժ չի մնացել, այս տարվա հոկտեմբերի 8-ի դատավճռով արդեն դատապարտվել է ազատազրկման:
Ըստ այդ դատական ակտի՝ Կոտայքի մարզի 50-ամյա բնակիչ Անդրեաս Մելքոնյանը թեթև աստիճանի ալկոհոլային հարբածության վիճակում 2014 թվականի մարտի 17-ին, ժամը 21-ի սահմաններում իրեն պատկանող ԳԱԶ-24 մակնիշի մեքենան գազալցակայանում լիցքավորելուց հետո ուղևորվել է իր բնակության վայր:
Նա դուրս է եկել Երևան-Աշտարակ ավտոճանապարհի՝ դեպի Աշտարակ տանող ուղեգոտի, երթևեկությունն իրականացրել է կողնակով և ՀՀ ճանապարհներին սահմանված աջակողմյան երթևեկությանը հակառակ ուղղությամբ, այն է՝ իրականացրել է ձախակողմյան երթևեկություն, դրանով ստեղծել է վթարային իրադրություն երթևեկության մյուս մասնակիցների, մասնավորապես՝ այդ կողնակում կանգնած հետիոտներ, անչափահասներ Լավրենտ Պ.-ի և Վաղարշակ Թ.-ի համար: Վարորդը թույլ է տվել համապատասխան օրենքի պահանջներին հակասող գործողություններ ու վրաերթի է ենթարկել անչափահասներին, որի հետևանքով Վաղարշակին պատճառել է մահ, իսկ Լավրենտիի առողջությանը՝ ծանր վնաս՝ կյանքին վտանգ սպառնացող:
Վրաերթից հետո Անդրեաս Մելքոնյանը թողել է պատահարի վայրը ու դիմել է փախուստի:
Դատարանում Անդրեաս Մելքոնյանն իրեն մեղավոր է ճանաչել ու միջնորդել է գործը քննել արագացված ընթացակարգով:
Տուժող Վաղարշակի իրավահաջորդ, մահացած տղայի հայր Է. Թադևոսյանը չի առարկել արագացված ընթացակարգով գործը քննելու դեմ:
Տուժող Լավրենտիի օրինական ներկայացուցիչ, ծանր վնասվածք ստացած տղայի հայր Հայկ Իխտիարյանը 2014 թվականի հուլիսի 22-ին դիմում է ներկայացրել դատարան ու հայտնել, թե քաղհայցի պահանջ չունի, չի առարկում դատաքննության արագացված կարգի դեմ, խնդրում է գործը քննել իր և որդու բացակայությամբ:
Տուժող կողմերը քաղհայցի պահանջ չեն ներկայացրել:
Ընդհանուր իրավասության դատարանը Անդրեաս Մելքոնյանին մեղավոր է ճանաչել ու դատապարտել 4 տարի ազատազրկման՝ 3 տարով էլ զրկելով տրանսպորտային միջոցներ վարելու իրավունքից:
Դատավճիռը չի բողոքարկվել և մտել է ուժի մեջ: