Ռուսական ռուբլու արժեզրկման պատճառով հայկական արտադրանքի մրցունակությունն այդ երկրում նվազել է: Այս մասին «Առաջին լրատվական»-ի հետ զրույցում ասաց «Արարատ» սննդի կոմբինատի տնօրեն Երվանդ Թարվերդյանը: Այնուամենայնիվ, նրա կարծիքով, հայկական արտադրանքը Եվրասիական տնտեսական միության՝ Ռուսաստանի, Ղազախստանի և Բելառուսի շուկայում իր տեղը կգտնի:
Իսկ 2015թ. հունվարի 1-ից Հայաստանի՝ ԵՏՄ-ին միանալուց հետո արտահանման դեպքում արդյոք անդամ երկրներից հայտարարագրեր, ծագման երկրներից սերտիֆիկատներ կամ այլ փաստաթղթեր կպահանջվեն: ՌԴ-ի, Ղազախստանի, Բելառուսի պետական հիմնարկները պատրա՞ստ են դրան, թե՞ ինչ-որ անցումային ժամանակահատված է պահանջվելու, որպեսզի Հայաստանը ներգրավենք այդ գործընթացներում: Այս և շատ այլ հարցեր մտահոգում են գործարարին՝ ԵՏՄ-ին անդամակցելուց հետո ստեղծվող նոր իրավիճակը հասկանալու համար: Ամեն դեպքում, Ե. Թարվերդյանին գոհացնում է այն հանգամանքը, որ այդ անդամակցությունից հետո Հայաստանի ձեռնարկությունները կարող են մասնակցել ՌԴ-ի պետական գնումների մրցույթներին և սպառում ունենալ ԵՏՄ-ի՝ մեզ համար ահռելի մեծ շուկայում: