Վրաստանի պաշտպանության նախկին նախարար Իրակլի Օքրուաշվիլին ազատ է արձակվել 15 հազար լարի գրավի դիմաց:
Ինչպես հաղորդում է «Գրուզիա Օնլայն»-ը, բոլոր վկաներն արդեն հարցաքննվել են: Այս կապակցությամբ վտանգ չկա, որ մեղադրյալը կարող է սպառնալ վկաներին: Դրա հետ մեկտեղ, Օքրուաշվիլին ինքնակամ է եկել Վրաստան և ներկայացել դատարան, հետևաբար՝ պատճառ չկա որպես խափանման միջոց կիրառել կալանքը: Այդ հիմնավորմամբ Վրաստանի Գլխավոր դատախազությունը միջնորդություն է ներկայացրել դատարանին՝ Օքրուաշվիլիին գրավի դիմաց ազատ արձակելու մասին:
Դատական գործը վերաբերում է այն ժամանակաշրջանին, երբ Օքրուաշվիլին զբաղեցրել է Վրաստանի պաշտպանության նախարարի պաշտոնը:
Հիշեցենք, որ 2008 թվականի մարտի 28-ին դատարանը վճռել էր Իրակլի Օքրուաշվիլիին դատապարտել 11 տարվա ազատազրկման: Վերջին տարիներին նա բնակվում էր Փարիզում, ուր և ստացել է քաղաքական ապաստան: Նա Վրաստանը լքել էր 2007 թվականի հոկտեմբերին՝ շորթման և ծառայողական լիազորությունների չարաշահման մեջ մեղադրվելուց հետո: 2011թ. նրա դեմ հեռակա կարգով կրկին մեղադրանք ներկայացվեց ավազակային խմբավորում ստեղծելու մեջ: Խորհրդարանական ընտրություններում «Վրացական երազանք» ընդդիմադիր կոալիցիայի հաղթանակից հետո Օքրուաշվիլին 2012թ. նոյեմբերին վերադարձավ Վրաստան և ձերբակալվեց օդանավակայանում:
