Ենթադրենք իշխանությունների ներկայացրած կենսաթոշակային բարեփոխումների մոդելը ամենալավն է: Սակայն ընդդիմադիր գրեթե բոլոր ուժերը (ՀԱԿ-ը ՀՅԴ-ն, «Ժառանգությունը») շատ հստակ դեմ են արտահայտվել այդ մոդելին, և եթե նրանք գան իշխանության, անմիջապես կքանդեն կենսաթոշակային կուտակային այն համակարգը, որը կներդնեն գործող իշխանությունները: Որտեղից գործող իշխանություններին այդքան վստահություն, որ իրենք մի 40 տարի ևս կմնան իշխանության գլուխ: Այս հարցը «Առաջին լրատվական»-ն այսօր տվեց ՀՀ աշխատանքի և սոցիալական հարցերի փոխնախարար Արտեմ Ասատրյանին և ԱԺ սոցիալական հարցերի մշտական հանձնաժողովի նախագահ Հակոբ Հակոբյանին: Ա. Ասատրյանը նշեց, որ այո, քաղաքական ընդհանուր կոնսենսուսը կարևոր է այս հարցում: «Կենսաթոշակային մեր բարեփոխումների փաթեթը ԱԺ-ում քննարկվել է և Ձեր նշած ընդդիմադիր ուժերը մասնակցել են քննարկումներին, և ունեն առաջարկություններ, որոնք հիմա քննարկվում են այս երկրորդ ընթերցման համար: Դրա շրջանակներում կարծում եմ 100%-անոց արդյունք, որ բոլորը բոլորին կհամոզեն, կարծում եմ անհնարին է, բայց կոնցեպտուալ առումով, որ մենք, այո, պետք է այս մոդելը ներդնենք, դա պիտի իրականացնել»,- պատասխանեց Ա. Ասատրյանը: Իսկ Հ. Հակոբայնը կարծում էր, որ օրինակ՝ ՀԱԿ-ի ներկայացրած կենսաթոշակային բարփոխումների տարբերակի և կառավարության տարբերակի միջև էական տարբերություն չկա: