Անդրադառնալով փողոցային առևտրի վերաբերյալ ԱԺ լսումների ընթացքում փոխքաղաքապետ Կամո Արեյանի այն հայտարարությանը, որ քաղաքապետարանի որոշումը վերջնական է, Մարդու իրավունքների նախկին պաշտպան, «Ժառանգություն» կուսակցության ԱԺ պատգամավոր Լարիսա Ալավերդյանը մեզ հետ զրույցում նշեց, որ նման դեպքերում նախ և առաջ մարդու խնդիրներն են լուծում, հետո կարգադրություն անում։ Նա մեջբերեց նաև Կամո Արեյանի մատնանշած այն փաստաթուղթը, որ այս օրենքն ընդունվել է դեռևս 2004թ.-ին և պարզապես չի գործել։
«Այ սա է խնդիրը` ինչո՞ւ մինչև հիմա օրենքը չի գործել։ Չի գործել, որովհետև չեն գտել լուծումը, որ և՛ քաղաքը գեղեցիկ լինի, և՛ սոված մարդկանց թիվը չմեծանա։ Նոր քաղաքապետը որոշել է մեծացնել սոված մարդկանց թիվը , իսկ հետո զբաղվել քաղաքի արտաքին տեսքով։ Այնինչ սկզբում պետք է ստեղծեին այլընտրանքային հնարավորություն, նոր զբաղվեին քաղաքի արտաքին տեսքով։ Հակառակ դեպքում նմանվում ենք այն մարդուն, որը չի տիրապետում իրավիճակին և դեռ չհագած ներքնաշորը` շտապում է վզկապը կապել»,- արձանագրեց Լարիսա Ալավերդյանը։
