«Ալ-Նուսրա ճակատ» իսլամական խմբավորման սիրիացի ապստամբները սկսել են պաշարել Սիրիայի հյուսիսում գտնվող օդանավակայանը, հաղորդում է «Ալ-Ջազիրա» հեռուստաալիքը:
Հեռուստաալիքի տեղեկություններով` ընդդիմադիրները հարձակվել են Հալեպի արևելքում գտնվող «Ալ-Նեյրաբ» բազայի վրա: «Ճակատի» հրամանատարության ներկայացուցչի խոսքերով` իրենց համախոհները շրջափակել են օդանավակայանը և վերահսկում են տարածքի մուտքերը:
Չնայած ընդդիմադիրները օդանավակայանն անվանում են ռազմական՝ փաստացիորեն դրա թռիչքուղին օգտագործվում է քաղաքացիական ավիցիայի համար:
Ավիաբազայում և օդանավակայանում տեղակայված կառավարական զորքերին հարվածելու համար իսլամիստները կիրառում են ինքնաշեն հրթիռներ և ավելի վաղ հափշտակված ականանետներ ու հրաձգային զենք:
Ապստամբները հայտարարել են, որ օդանավակայանի վրա վերահսկողություն հաստատելու շնորհիվ` հակառակորդը չի կարող զինամթերք ստանալ, այդ պատճառով իրենք շատ կարևոր են համարում այս գործողությունը:
Նշենք, որ նախօրեին Սիրիայի ընդիմադիրները գրավել էին Իդլիբում տեղակայված “Տաֆթանազ” ուղղաթիռային բազան:
«Ալ-Նուսրա ճակատ» խմբավորումը չի թաքցնում, որ իր գլխավոր խնդիրն է Սիրիայում կառուցել իսլամական պետություն: Այս կազմակերպության ղեկավարությունը հերքում է, որ որևէ կապ ունի օտարերկրյա ահաբեկչական ցանցերի հետ:
