Հայաստանի բռնցքամարտի ֆեդերացիան տեղեկացնում է, որ սույն թվականի ապրիլի 11-17-ը Կարեն Դեմիրճյանի անվան մարզահամերգային համալիրում կանցկացվի Գագիկ Ծառուկյանի անվան մրցաշարը: Մրցաշարն անցկացվում է երկրորդ անգամ. առաջին անգամ այն անցավ Գագիկ Ծառուկյանի հովանու ներքո:
«Առաջին լրատվականը» համոզվելու համար, որ մրցաշարն այս անգամ իսկապես կրում է Ծառուկյանի անունը, երկրորդ անգամ զանգահարեց բռնցքամարտի ֆեդերացիա և այնտեղից հաստատեցին, որ այո, Գագիկ Ծառուկյանի անվան, ոչ թե հովանու ներքո:
Ինչպես պարզվում է, սա պատմության մեջ առաջին նման դեպքը չէ. Թուրքմենստանի բռնապետ նախագահ Թուրքմենբաշի Սափարմուրատ Նիյազովը, ով իշխել է 15 տարի շարունակ, կենդանության օրոք իր անվան ֆուտբոլային մրցաշար էր անցկացնում` «Թուրքմենբաշու գավաթ»:
Անցնելով երևանյան մրցաշարին` նշենք, որ բացի Հայաստանի և ԼՂՀ հավաքականներից, կմասնակցեն ևս 21 պետություն՝ Ուկրաինա, Անգլիա, Իռլանդիա, Իսպանիա, Գամբիա, Թունիս, Իրան, Վրաստան, Իսրայել, Գվինեա, Տաջիկստան, Հնդկաստան, Ղազախստան, Մոնղոլիա, Չեխիա, Մոլդովա, Տրինիդադ Տոբագո, Ռուսաստան, Հունաստան, Ուզբեկստան, Բուլղարիա։