Ինչո՞ւ պետք է ոչ հայ զբոսաշրջիկները գան Հայաստան: Երբ դիտարկում ենք զբոսաշրջիկների նախընտրած երկրների ցուցակը, տեսնում ենք, որ դրանք հիմնականում զարգացած երկրներն են` Շվեյցարիա, Գերմանիա, Ֆրանսիա, Ավստրիա, Շվեդիա, ԱՄՆ, Մեծ Բրիտանիա, Իսպանիա, Կանադա, Սինգապուր և այլն, որոնք նախ և առաջ աչքի են ընկնում իրենց ապահովությամբ, անվտանգությամբ և որակյալ ենթակառուցվածքներով:
Վերջերս համաշխարհային տնտեսական ֆորումը հրապարակել էր «Ճամփորդություն և զբոսաշրջություն. մրցունակություն 2011» զեկույցը, որտեղ Հայաստանը 139 երկրների շարքում զբաղեցրել է 90-րդ տեղը: Զեկույցում բոլոր ինդեքսները համախմբված են 3 խմբի մեջ` «Ճամփորդություն և զբոսաշրջություն. կարգավորման դաշտ» (մենք 58-րդ տեղում ենք), «Ճամփորդություն և զբոսաշրջություն. գործարար միջավայրն ու ենթակառուցվածքները» (100-րդ տեղում ենք) և «Մարդկային մշակութային և բնական ռեսուրսներ» (107-րդ տեղում ենք):
Այս երեք խումբ ինդեքսները բաղկացած եմ մի շարք ենթաինդեքսներից: Հայաստանի վիճակը ամենավատն է ոստիկանական ծառայությունների հուսալիության տեսակետից (112-րդ տեղում ենք), շրջակա բնական միջավայրի գրավչությամբ (124-րդ տեղ), էկոլոգիական իրավիճակի կայունությամբ (111-րդ տեղ), օդային տրանսպորտի ենթակառուցվածքների որակով (95-րդ), վերգետնյա տրանսպորտի ենթակառուցվածքների որակով (106-րդ), տեղեկատվական հասարակությանը բնորոշ տեխնոլոգիաների առումով ((լայնաշերտ ինտերնետ, հեռախոսային գծեր և այլն) 97-րդ):
