WikiLeaks սկանդալային պորտալի ենթադրյալ ինֆորմատոր, շարքային Բրեդլի Մենինգի դատավճիռը հունվարի 8-ին նախնական լսումների ընթացքում նախապես կրճատվել է 112 օրով: Այս մասին հայտնում է France-Presse-ը:
Դատավճռի կրճատման մասին որոշումը դատավոր Դենիզ Լինդը բացատրել է դաժան վերաբերմունքով, որի ենթարկվել է բանտարկյալը զինվորական բանտում գտնվելու ժամանակ: Նա նշել է, որ Մենինգը, հոգեբույժների խորհուրդներին հակառակ, ապօրինաբար ուղարկվել է մենախուց: Եթե Մենինգի մեղքը հաստատվի, ապա նրա ազատազրկման ժամկետից 112 օր կպակասի:
Միևնույն ժամանակ դատավորը մերժել է փաստաբանի խնդրանքը Մենինգի վրայից բոլոր մեղադրանքները հանելու վերաբերյալ՝ կապված նրան ամերիկյան ռազմաբազայում պահելու հետ:
Մենինգը 2010-ի ամռանը փակվել է Վիրջինիա նահանգի Կուանտիկո ռազմաբազայի բանտում և այնտեղ 9 ամիս անցկացրել: Փաստաբանի խոսքով՝ օրական 23 ժամ բանտարկվածը գտնվել է պատուհաններ չունեցող մենախցում, որտեղ նրան թողել են առանց հագուստի: Իր հետ դաժան վերաբերմունքի մասին Մենինգը պատմել էր 2012-ի նոյեմբերի վերջին՝ մինչդատական լսումների ժամանակ:
Բանտի անվտանգության ծառայությունը հերքել է նրա խոսքերը՝ պարզաբանելով, որ նրան պահման հատուկ ռեժիմի են տարել՝ կապված ինքնասպանության դիմելու հակումների հետ: 2011-ին Մենինգին ուղարկել են Կանզասի «Լիվենուորթ» բազայի բանտ, որտեղ բանտի ղեկավարությունը նրա մոտ ինքնասպանության դիմելու հակում չի հայտնաբերել և թույլատրել է մեղմացնել վերահսկողությունը:
Մենինգը, որը Իրաքում եղել է ռազմական վերլուծաբան, մեղադրվում է Wikileaks-ին գաղտնի տեղեկությունների փոխանցման մեջ: Նրա դեմ առաջադրվել են մեղադրանքներ՝ 22 հոդվածներով: 2012-ի նոյեմբերին նա համաձայնել է ճանաչել իր մեղքը դրանցից 8-ում: Այդ կետերով նրան սպասվում է 16 տարվա ազատազրկում: Ենթադրվում է, որ նրա դեմ դատը կսկսվի 2013-ի մարտին:
