Շենգավիթ վարչական շրջանի ընդհանուր իրավասության դատարանում Ալեքսանդր Ազարյանի նախագահությամբ սկսվեց Վրաստանի երեք քաղաքացիների՝ Գագա Կոպալիանիի, Նիկա Ղվալաձեի և Այվազ Իզմաիլովի գործի դատական քննությունը:
24-25 տարեկան ամբաստանյալներից առաջին երկուսը վրացի են, երրորդը՝ եզդի:
Նրանք մեղադրվում են խմբի կազմում նախնական համաձայնությամբ, ապօրինի կերպով շինություն մուտք գործելով ու զենքի գործադրմամբ կատարած ավազակային հարձակման համար՝ ՀՀ քրեական օրենսգրքի 175 հոդվածի 2-րդ մասի 1-ին, 2-րդ, 3-րդ և 4-րդ կետերով:
Ըստ մեղադրանքի՝ Գագան, Նիկան ու Այվազը նախնական համաձայնության են եկել, ժամանել Հայաստան և 2013 թվականի դեկտեմբերի 1-ին, ժամը 21-ն անց 30-ի սահմաններում դանակներով զինված ներխուժել են Գարեգին Նժդեհի փողոցում գործող համակարգիչների խանութ:
Ավազակները հարձակում են գործել խանութի տիրոջ ու այդ պահին խանութում գտնվող նրա ընկերուհու վրա, դանակների գործադրմամբ տուժողների կյանքի և առողջության համար վտանգավոր բռնություն գործադրելու սպառնալիքներ են տվել, կպչուն ժապավենով կապկպել նրանց: Հոգեկան ծանր վիճակի մեջ գցելով տուժողներին՝ ավազակները խանութից հափշտակել են դյուրակիր համակարգիչներ, բջջային հեռախոսներ, ինչպես նաև 20 հազար դրամ ու 2 դոլար: Նրանց հափշտակածի ընդհանուր արժեքը կազմել է 1 միլիոն 694 հազար 807 դրամ:
Ավազակային հարձակմամբ հափշտակած ավարով հանդերձ երեք ավազակները ճամփա են ընկել դեպի Վրաստան, սակայն նրանց անմիջապես հետապնդել ու օպերատիվ կերպով բռնել են հենց Հայաստանի տարածքում: Հափշտակված գույքն առգրավվել է, ապա ի պահ է հանձնվել տուժողներին, իսկ հարևան հանրապետությունից եկած «անհաջողակ գաստրոլյորներն» էլ ձերբակալվել են:
Հարձակման պահին իրենց բավական բիրտ դրսևորած երիտասարդները ամբաստանյալի աթոռին նստած էին խելոք ու ժպտերես: Նրանց խաղաղությանը նպաստում էին նաև տուժողների քաղաքակիրթ վերաբերմունքն ու ներողամտությունը:
Նախաքննության ընթացքում իրենց մեղավոր չճանաչած ամբաստանյալները դատարանում ընդունեցին իրենց մեղքն ու միջնորդեցին գործը քննել արագացված ընթացակարգով:
Մեղադրողն ու տուժողները չառարկեցին:
Դատարանը հրապարակեց ամբաստանյալների անձը բնութագրող փաստաթղթերը:
Ամբաստանյալներից՝ Այվազն ու Նիկան Վրաստանում դատապարտված են եղել: Այդ հանգամանքը որպես նրանց պատասխանատվությունն ու պատիժը ծանրացնող, երևի, չի դիտվի, բայց նկատի կառնվի որպես բնութագրող հանգամանք:
24-ամյա Նիկան ամուսնացած է, կինն ուսանողուհի է, նա 2,5 տարեկան որդի ունի:
Ամբաստանյալների շահերի պաշտպան Լուսինե Ավագյանը ներկայացրեց Թբիլիսիից ստացված բնութագրերը, որոնք տրվել էին ամբաստանյալներին՝ նրանց բնակության վայրերի «բակերի նախագահների» կողմից: Երեք ամբաստանյալներն էլ բնութագրվել են որպես բարյացակամ, լավ, դրական վարքագծով երիտասարդներ, ովքեր հոգ են տանում իրենց ընտանիքների համար:
Տուժողները հայտնեցին, թե քաղաքացիական հայցի պահանջ չեն ներկայացնում՝ հափշտակված ամբողջ գույքը վերադարձվել է:
Նրանք ամբաստանյալների պատժի հարցում խստություն չպահանջեցին, այդ հարցը թողեցին դատարանի հայեցողությանը:
Մեղադրող դատախազ Ռ. Էլիզբարյանը ժամանակ խնդրեց մեղադրական ճառին պատրաստվելու համար:
Հաջորդ դատական նիստը տեղի կունենա նոյեմբերի 21-ին:
Ամբաստանյալների շահերի պաշտպանը նիստի ավարտին իր պաշտպանյալների անունից ներողություն խնդրեց տուժողներից:
Տուժող աղջիկն ասաց, որ ամբաստանյալ Նիկայի երկուսուկես տարեկան որդու պատճառով են իրենք ներողամտություն հանդես բերում: Ավազակային հարձակման պահին իրենց նկատմամբ վերաբերմունքը կոպիտ է եղել, իրենց ապրումները եղել են շատ ծանր, բայց ավազակները բռնվել են, հափշտակված գույքն առգրավվել է, դատարանն էլ թող օրենքի սահմաններում նրանց պատասխանատվության ենթարկի:
