Սահմանադրական դատարանը երեկ սահմանադրական է ճանաչել Հայաստանի անդամակցությունը Եվրասիական տնտեսական միությանը, քննարկելով այդ անդամակցության պայմանագիրը: Սահմանադրական դատարանից, որը Հայաստանում իրար հետևից պարբերաբար վավերացրել և սահմանադրական է ճանաչել Հայաստանի համապետական կեղծված ընտրությունները, երևի թե այլ բան սպասել պետք էլ չէր, և միամտություն կլիներ կարծել, որ Սահմանադրական դատարանը որևէ այլ որոշում էր կայացնելու ԵՏՄ-ին Հայաստանի անդամակցության հարցում:
Ըստ էության, ՍԴ այս որոշումը կարող ենք համարել հենց Հայաստանում կեղծված ընտրությունների և իշխանության յուրացման սահմանադրականության վերաբերյալ 1996 թվականից ի վեր կայացվող որոշումների ամփոփումը: Սահմանադրական դատարանը երեկ կայացրած իր որոշումով ամփոփեց, ըստ էության, Հայաստանում կեղծված բոլոր ընտրություններն ու իշխանության բռնի, անօրինական յուրացումը վավերականացնող իր բոլոր նախկին որոշումները:
ԵՏՄ-ին անդամակցելու Հայաստանի որոշումը, ըստ էության, հենց այս կեղծված ընտրությունների և իշխանության յուրացման արդյունք է եղել: Հայաստանում կեղծված ընտրություններն են հանգեցրել պետության թուլացման, ընտրական մեխանիզմի խափանումը, պետական իշխանության մարդկանց մի խմբի կողմից յուրացումն է եղել Հայաստանի պետականությունը դե ֆակտո վերացնելու պատճառը, որի արդյունքում Հայաստանը պատերազմ հաղթած պետությունից վերածվել է մուրացիկ պետության, որի արդյունքում Հայաստանում ահռելի չափերի է հասել կոռուպցիան, աղքատությունը, արտագաղթը, այլ անօրինականությունները:
Այս ամենի արդյունքում էլ Հայաստանը բացարձակապես անզոր է գտնվել դիմադրել ակնհայտորեն Հայաստանի անկախությանն ու ինքնիշխանությանը սպառնացող ռուսական կայսերական եվրասիական նախագծին և բռնակցվել է Եվրասիական տնտեսական միությանը՝ աթոռապաշտության և կապիտալապաշտության մոլուցքով առաջնորդվող իշխանական համակարգի որոշման արդյունքում` շրջանցելով ժողովրդի, հասարակության կամքը:
Ըստ էության, Սահմանադրական դատարանը 2014 թվականին իր որոշումով ամփոփել է Հայաստանի անկախ պետականության խափանված ընթացքը և կնքել պետականության չեզոքացումը` համարելով այն սահմանադրական: ՍԴ-ից հետո ԵՏՄ-ին անդամակցության պայմանագիրը կգնա Ազգային ժողով: Ավելորդ է ասել, թե ինչ կլինի այնտեղ այդ պայմանագրի ճակատագիրը: Պետության ճակատագիրը մեր բոլորիս աչքի առաջ է, որի մի հսկա մասը կերտվել է նաև հենց այդ Ազգային ժողովի գործողությունների ու որոշումների տխուր արդյունքում:
