«Պետք է հետևողական լինել, որ միջազգային հանրությունն այս դեպքում պետք է կոնկրետ գնահատական տա, և այդ գնահատականը լինի հասցեական: Եթե մյուս դեպքերում այնպիսի մի իրավիճակ էր, որ հրադադարի ռեժիմի խախտելու հետ կապված՝ չէին կարող կոնկրետ որոշել, թե որ կողմն է առաջինը կրակել, այս դեպքում փաստն արդեն իսկ ակնհայտ է, թե ով է խախտել ռեժիմը»,- «Առաջին լրատվական»-ի հետ զրույցում ասաց Ազգային ժողովի պետաիրավական հարցերի մշտական հանձնաժողովի նախագահ Հովհաննես Սահակյանը՝ անդրադառնալով Ադրբեջանի կողմից Լեռնային Ղարաբաղի զինված ուժերին պատկանող ուղղաթիռի խոցմանը:
Հիշեցնենք, որ օրեր առաջ ուսումնավարժական միջոցառման ժամանակ այդ ուղղաթիռը խոցվել էր ադրբեջանական կողմից: Ուղղաթիռում եղել են ԼՂՀ բանակի երեք սպաներ, որոնք զոհվել են: Մինչև այժմ ադրբեջանական կողմը թույլ չի տալիս, որ հայկական կողմը մոտենա ուղղաթիռին և զոհվածների մարմինները դուրս հանի: Իսկ այդ միջադեպից հետո միջազգային գրեթե բոլոր կառույցները, այդ թվում և ԼՂՀ հակամարտության կարգավորման մանդատն ունեցող Մինսկի խմբի համանախագահներն իրենց հայտարարություններում կողմերին հավասարապես հանդարտության և իրավիճակը չսրելու կոչեր են անում՝ առանց նշելու, որ կոնկրետ այս դեպքում Ադրբեջանն է մեղավոր: Եվ որ Ադրբեջանն իր այս վերջին գործողությամբ աննախադեպ քայլ է կատարել, քանի որ հրադադարից հետո երբևէ ուղղաթիռ չի խոցվել:
Արդյոք նման դեպքում միջազգային կառույցների այս «հավասարակշիռ» մոտեցումը հայկական դիվանագիտական ոչ լիարժեք աշխատանքի արդյունքը չէ՞: Հիշեցնենք, «Դաշնակցություն» խմբակցության քարտուղար Աղվան Վարդանյանն անդրադառնալով այդ միջադեպին՝ նման կարծիք էր հայտնել: «Միջազգային դիվանագիտական կառույցները միգուցե չեն ուզում էլ ավելի սրել իրավիճակը, որպեսզի հետագայում չդառնա նոր կոնֆլիկտների խթան: Բայց այս դեպքում եթե մեր միջազգային հանրությունը և այն մարդիկ, ովքեր պարտավոր են հստակ դիրքորոշում հայտնել, բայց կրավորական դիրք են ընդունում, հղի է նմանատիպ դրսևորումներով:
Հետևաբար, մենք պետք է փորձենք, որ միջազգային կառույցները հստակ դիրքորոշում հայտնեն: Հիշենք, թե ինչ իրավիճակներում է Ադրբեջանը նմանատիպ ագրեսիվ քայլերի դիմում: Նախագահների ցանկացած հանդիպումից առաջ և հետո, հրադադարին և խաղաղությանը միտված ցանկացած շեշտադրումից հետո ադրբեջանական կողմը միշտ նմանատիպ սադրիչ քայլերի է դիմում»,- ասաց Հ.Սահակյանը:
Պատգամավորը նաև գտնում է, որ համատեղ ուսումնավարժական զորավարժությունների ժամանակ Ադրբեջանի կողմից հայկական ինքնաթիռի խոցումը նշանակում է, որ այդ երկիրը խուճաի մեջ է: Իսկ խուճապը, նրա խոսքերով, առաջացել է Արցախի բանակի զորավարժությունների պատճառով, ինչը ուժի ցուցադրում էր: Այնուամենայնիվ, ավելի ճիշտ չէ՞, որ այսուհետ հայկական կողմը կամ հայկական դիվանագիտությունը միջազգային կառույցներում այնպիսի քաղաքականություն վարի, կամ մեր պաշտոնյաներն այնպիսի հայտարարություններ անեն, որ օտարերկրյա պաշտոնյաների տեսակետները լինեն ավելի հասցեական:
«Ես կարծում եմ, որ այն հայտարարությունը, որը տարածել էր մեր արտգործնախարարությունը, և տարբեր ձևաչափերով՝ այլ պաշտոնյաներ, ինչպես նաև ԱԺ նախագահը, դրան էլ միտված են: Կարծում եմ, որ պետք է չերևացող աշխատանք տանել, որպեսզի առաջին հերթին թույլ տրվի մոտենալ ուղղաթիռին և վերցնել զոհերի մարմինները: Մենք պետք է բավականին արագ գործողություններ կատարենք»,- ասաց Հ.Սահակյանը:
