«Իրազեկ քաղաքացիների միավորում» հասարակական կազմակերպությունը հրապարակել է ներմուծվող այն ապրանքների ցանկը, որոնք ԵՏՄ-ին Հայաստանի անդամակցության հետևանքով ենթակա են թանկացման: Կազմակերպությունը հրապարակել է նաև տոկոսային հարաբերակցությունը, թե որ ապրանքը քանի տոկոսով կթանկանա: Մասնավորապես, ըստ այդ ուսումնասիրության, առավելագույնը կթանկանա խոզի միսը՝ մինչև 55 տոկոս, 15 տոկոսով կթանկանա թռչնի միսը, 12.3 տոկոսով ՝ կաթը և սերուցքը, կաթի փոշին: Մինչը 12.5 տոկոսով կթանկանա կարագը, 13.3 տոկոսով սառեցված կարտոֆիլը, 15 տոկոսով ՝ լոլիկը, սոխը, սխտորը, չորացված լոբազգի բանջարեղենները, 8.1 տոկոսով՝ թեյը, բրինձը՝ 13.3 տոկոսով, դեղամիջոցները՝ 12.3 տոկոսով: Նույնքան և մի քիչ ավելի կթանկանան ներկերն ու լաքերը, մազերի համար միջոցները, օճառը, լվացող ու մաքրող միջոցները, անձեռոցիկները: Անգամ զուգարանի թուղթը՝ 8.5 տոկոսով: Կթանկանան արծաթն ու ոսկին՝ 18 և 19 տոկոսներով:
Տնտեսական զարգացման և հետազոտությունների կենտրոնի տնօրեն Կարինե Հարությունյանի խոսքերով՝ չի կարելի հստակ ասել, որ այդ ապրանքները պարտադիր հունվարի 1-ից կթանկանան նշված տկոսոներով, քանի որ նախ պետք է հստակեցնել, որ կթանկանան միայն այն ապրանքները, որոնք ներմուծվում են Եվրոպայից, ԱՄՆ-ից, Բրազիլիայից և այլ երկրներից: «Պետք է հստակեցվի, քանի որ Ռուսաստանից, Բելառուսից ներկրվողները՝ հակառակը, կարող է առավել մատչելի լինեն: Մենք ևս հետազոտություններ ենք արել և հրապարակել ենք, թե որ ապրանքախմբերի համար որքան կավելանա մաքսատուրքը, բայց դա չի նշանակում, որ Հայաստանում այդ ապրանքախմբից որևէ ապրանքի գին պարտադիր կաճի: Հնարավոր է՝ այդ ապրանքը փոխարինվի բելառուսականով, ռուսականով»,-«Առաջին լրատվական»-ի հետ զրույցում ասաց Կարինե Հարությունյանը՝ հավելելով, որ ամեն դեպքում կան ապրանքներ, որոնց համարժեք փոխարինող գտնել հնարավոր չէ կամ դժվար է: «Կարճ ժամանակում կյանքը ցույց կտա, թե ինչ պատկեր կունենանք: Եթե մեր գործարարները, ներմուծողները արագ հասցնեն նոր գործընկերներ գտնել Ղազախստանում, Բելառուսում, Ռուսաստանում, գուցե ինչ-որ ձևով, ինչ-որ մասով փոխհատուցվի: Բայց դուք ինքներդ էլ հասկանում եք, որ, օրինակ, գերմանական շոկոլադը չի փոխարինվի բելառուսական շոկոլադով, և ներմուծվող գերմանական շոկոլադը բնականաբար կթանկանա»:
Ինչ վերաբերում է մնացած ապրանքներին, ապա Հարությունյանը նշեց, որ կրկին հստակություն է պետք, քանի որ, օրինակ, թեյի և սուրճի համար կա արտոնյալ ժամանակահատված, և մինչը 2019 թվականը այդ ապրանքները չեն թանկանա: Մինչև 2022 թվականը արտոնյալ ժամանակահատված է նաև ընտանի թռչնի մսի և մսամթերքի համար, 2020 թվականը՝ կաթի, սերուցքի, պարարտանյութերի համար: «Բայց դրա համար չպետք է շատ ուրախանալ, քանի որ եթե կարճաժամկետում չի թանկանում, ապա դա դեռ չի նշանակում, որ 2019-ից կամ 2020-22-ից հետո չի թանկանալու: Միևնույն է, այդ ապրանքը թանկանալու է»,- հավելեց Հարությունյանը՝ հավելելով, որ, անկախ ամեն ինչից, հունվարից որոշ ապրանքների մասով կունենանք գնաճ, քանի որ մենք ունենք Եվրոպային ներմուծվող ապրանքներ, որոնք ԵՏՄ երկրներից այս պահին չեն ներմուծվում:
Ինչ վերաբերում է ստեղծված իրավիճակում կառավարության անելիքներին, սպասվող գնաճը մեղմելու հնարավոր քայլերին, ապա Հարությունյանը դժվարացավ կարծիք հատնել: «Ճիշտն ասած՝ դեռ լավ չեմ պատկերացնում, թե կառավարությունը ինչ կարող է ասել, բայց սա լավ հնարավորություն է, որ մեր տեսական գործարարներին հնարավորություն տանք, որպեսզի օգտվեն ստեղծված վիճակից, ամբողջությամբ ազատականացվի մեր ներքին շուկան, որպեսզի մեր գործարարը կարողանա ինքն արտադրել: Քանի որ եթե որոշ ապրանքներ էժան չեն ներմուծվելու Հայաստան, գուցե Հայաստանում արտադրվեն դրանք, և զարկ տրվի հայկական արտադրությանը»,-եզրափակեց տիկին Հարությունյանը:
Լուսանկարը՝ Photolure-ի