Հայաստանի գյուղատնտեսության նախարարության սննդամթերքի անվտանգության պետական ծառայությունն ու ՌԴ անասնաբուժական և բուսասանիտարական հսկողության դաշնային ծառայությունը համաձայնության են եկել, և այսուհետ հայկական մսամթերքը կիրացվի ռուսական շուկայում:
Երկու գերատեսչույթունների ղեկավարները հանդիպման ընթացքում քննարկել են ինչպես ՌԴ ձուկ-ձկնամթերք արտահանելու թույլտվություն ունեցող կազմակերպությունների ցանկը, այնպես էլ միս-մսամթերք վերամշակող կազմակերպությունների արտադրանքը ռուսական շուկա արտահանելու նպատակով իրականացվելիք անհրաժեշտ գործողություններն ու ընթացակարգերը: Ըստ այդմ՝ երեկվանից արդեն մսամթերք արտադրող և վերամշակող թվով 11 տեղական արտադրողների հնարավորություն է ընձեռվել իրականացնել գառան, խոզի, տավարի և հավի մսից պատրաստված մսամթերքի արտահանում ՌԴ:
Ուշագրավ է, որ արտահանման թույլտվություն ստացած ընկերությունների ցանկում՝ «Արաքս» թռչնաֆաբրիկա, «Նաստֆուդ», «Աթենք», «Բարի Սամարացի», «Բեկոն պրոդուկտ», «Մուշ» և այլ ընկերությունների հետ, Ռուսաստան մսամթերք կարտահանի նաև ԱԺ ՀՀԿ-ական գործարար պատգամավոր Սամվել Ալեքսանյանին պատկանող «Նատալի ֆարմ» ՍՊԸ-ն:
«Նատալի ֆարմ»-ը դեղամիջոցների խոշոր ներմուծող է Հայաստանում: Ընդամենը վերջերս էր ՀՀ կառավարության կողմից Սամվել Ալեքսանյանի «Նատալի ֆարմ»-ին թմրամիջոցների և հոգեմետ դեղերի ներկրման և իրացման լիցենզիա հատկացվել: Եվ եթե այդ դեպքում լիցենզիա տրամադրելու մեջ տրամաբանություն կար, ապա վերը նշված դեպքում այդ տրամաբանությունը բացակայում է: Առնվազն անհասկանալի է, թե ինչպես կարող է դեղ ու թմրամիջոցներ ներկրող ընկերությունը մսամթերք արտահանել:
Չնայած, եթե հաշվի ենք առնում, որ այդ ընկերությունը պատկանում է Սամվել Ալեքսանյանին, ապա ամեն ինչ տրամաբանական է դառնում:
Լուսանկարը՝ eMedia.am-ի