Հայաստանի Ազգային ժողովում ավարտին են մոտենում բյուջետային քննարկումները, որոնք ստվերում մնացին ղարաբաղա-ադրբեջանական շփման գծում հայկական ուղղաթիռի խոցման միջադեպի պատճառով: 2015 թվականի բյուջեի քննարկումը ԱԺ-ում ընդմիջվել է, և 24 ժամվա ընթացքում պետք է խմբակցություններն առաջարկներ ներկայացնեն բյուջեի նախագծում փոփոխությունների կամ լրացումների կապակցությամբ:
Բյուջետային քննարկումները, սակայն, աչքի ընկան բոլորովին այլ ասպեկտներով, որոնք ըստ էության բյուջեի թվային արտացոլման կամ փիլիսոփայության հետ ընդհանուր քիչ կապ ունեն: Խոսքը վերաբերում է, այսպես ասած, ոչ իշխանական ուժերի կողմից վարչապետ Հովիկ Աբրահամյանի և նրա կառավարության հանդեպ վերաբերմունքին: Ոչ իշխանական ուժերը հայտարարել են, որ դեմ են քվեարկելու կառավարության բերած բյուջեին, սակայն սա չէ, իհարկե, կարևորը, քանի որ նրանք շատ լավ գիտեն, որ ՀՀԿ-ի կողմ լինելը ինքնին բավարար է բյուջեն ընդունելու համար, և իրենց դեմը բյուջեն չի կարող տապալել:
Փոխարենը պետք էր, իհարկե, տեսնել, թե ոչ իշխանական ուժերը` ԲՀԿ-ի գլխավորությամբ, ինչպես էին փայփայում Հովիկ Աբրահամյանին ու նրա կառավարությանը: Լսելով ԲՀԿ-ականների ելույթները` կարելի էր տպավորություն կազմել, որ նրանք տեղյակ չեն, որ արդեն ավելի քան կես տարի է Հայաստանում Հովիկ Աբրահամյանն է վարչապետ, ոչ թե Տիգրան Սարգսյանը: Այնպիսի տպավորություն էր, որ ԲՀԿ-ում մոռացել էին ապրիլին կառավարության փոփոխության իրենց պահանջները և դրանց ի կատար ածումը:
Ի՞նչ պատճառներ ունեն ԲՀԿ-ում Հովիկ Աբրահամյանի հանդեպ նման խնամակալ մոտեցման համար: Խնամիությո՞ւնն է միակ պատճառը, որ կա Հովիկ Աբրահամյանի և Գագիկ Ծառուկյանի միջև, թե՞ կան այլ` այսպես ասած քաղաքական պատճառներ: Խնամիությունն, իհարկե, փոքր պատճառ չէ, հատկապես հայաստանյան արժեհամակարգի և մենթալիտետի պայմաններում, որի վառ կրողներն են և Աբրահամյանը, և Ծառուկյանը: Սակայն իրավիճակը զուրկ չէ, իհարկե, նաև քաղաքական դրդապատճառներից:
Խնդիրն այն է, որ ԲՀԿ-ի համար, օրինակ, Հովիկ Աբրահամյանը ավելի մեծ նշանակություն ունի քաղաքական պլանում, քան, ասենք, ՀԱԿ-ն ու «Ժառանգությունը»: Հովիկ Աբրահամյանը ԲՀԿ-ի համար մի կամուրջ է, որը կամ իշխանության է տանելու, կամ էլ չհաջողելու դեպքում ապահովելու է իշխանությունների և ԲՀԿ-ի կապը, այսինքն` ԲՀԿ-ի նահանջի ճանապարհն է ապահովելու: Այդ պատճառով էլ ԲՀԿ-ում նման վերաբերմունք է Հովիկ Աբրահամյանի հանդեպ, և այդ իսկ պատճառով երկրի տնտեսական վիճակի քննադատության թիրախում ոչ իշխանական ուժերի մոտ շարունակում են մնալ Տիգրան Սարգսյանը, նրա նախկին նախարարները:
Ըստ որում` հետաքրքրական է, որ խնամակալությունը շարունակվում է անգամ Հովիկ Աբրահամյանի այն հայտարարությունից հետո, որ 12 կետերը չեն վերանայվի: Ավելին` բոլորն են հիշում նաև վարչապետի հայտարարություններն ու զայրացած դիմումները ԲՀԿ-ին, թե` մի՞թե նոր Մարտի 1 կամ իշխանափոխություն եք ուզում: Այս ամենից հետո, սակայն, ԲՀԿ-ն պարտաճանաչ կերպով խամում է խնամուն, որովհետև Հովիկ Աբրահամյանին ոչ իշխանական ուժերի հասցեին այդօրինակ տոնայնության իրավունք տալը ևս մտնում է խնամակալության շրջանակի մեջ, որովհետև Աբրահամյանի ներիշխանական դիրքերը կախված են նրանից, թե նա ինչքան համարձակ կլինի ոչ իշխանական ուժերի հանդեպ: