«Ես չեմ կարծում, թե Ռազմիկ Զոհրաբյանի հայտարարությունը նշանակում է, որ նման հանդիպում եղել է, որովհետև Ռազմիկ Զոհրաբյանը ո՛չ Սերժ Սարգսյանի մամլո խոսնակն է, ո՛չ Գագիկ Ծառուկյանի և ո՛չ էլ Հանրապետական կուսակցության: Հայտնի են Ռազմիկ Զոհրաբյանի հայտարարությունները՝ տարբեր ժամանակաշրջաններում արված, դրանց գոնե 90 տոկոսոը իրականության հետ որևէ կապ չունեն»,- «Առաջին լրատվական»-ի հետ զրույցում նման տեսակետ հայտնեց «Ազգային անվտանգություն» կուսակցության նախագահ Գառնիկ Իսագուլյանը՝ ի պատասխան Ռազմիկ Զոհրաբյանի այն հայտարարության, թե Սերժ Սարգսյանն ու Գագիկ Ծառուկյանը հանդիպել են, և մեր հարցի, թե արդյո՞ք այդ հանդիպումն էր ԲՀԿ-ի՝ հանրահավաքների ճանապարհն ու տեղը ցույց տալու հայտարարության պատճառը:
Նրա դիտարկմամբ՝ եթե նույնիսկ նման հանդիպում եղել է, ապա դա որևէ կապ չունի «Բարգավաճ Հայաստան»-ի հայտարարության հետ:
Իսագուլյանի խոսքերով՝ Սերժ Սարգսյանին շանս է տրված պատմության մեջ մնալու․ «Նրա մեծագույն առաքելությունը կլինի այն, որ նա իշխանությունը հանձնի ու հեռանա, ինքը նախաձեռնի արտահերթ խորհրդարանական և նախագահական ընտրություններ, ինքն էլ երաշխավորի, որ դրանք արդար, ազատ ու թափանցիկ կանցնեն: Ես վստահ եմ, որ ժողովուրդը կների նրան այդ դեպքում»:
Մեր այն հարցին, թե գուցե այս կերպ Հովիկ Աբրահամյա՞նը լավամարդ դուրս գա, եթե բավարարի այդ տասներկու կետերը, թե՞ Լևոն Տեր-Պետրոսյանի ամիսներ առաջ արված հայտարարությունը, նրա թալանչի լինելու հետ կապված, ուժի մեջ է, Իսագուլյանը պատասխանեց․ «Ժամանակին Լևոն Տեր-Պետրոսյանի հասցեին էլ են նման բաներ ասել, և նրա ասածները ես չէ, որ պետք է մեկնաբանեմ, կամ թե նա դա ինչ կոնտեքստում է ասել: Ինչքան էլ կառավարություն փոխվի, որոշումները մի տեղ են կայացվում, և այնտեղից եկած հրահագներով են առաջնորդվում: Նույնիսկ չի բացառվում, որ Հովիկ Աբրահամյանը կուզենար, որ լավ գործեր արած լիներ, բայց ես վստահ եմ, որ թույլ էլ չեն տա»:
Հարցազրույցն ամբողջությամբ՝ մեր տեսանյութում։