Ինչպես փոխանցում է ԱՄՆ-ում տպվող հայալեզու Ասպարէզ թերթը, Թուրքիայի վարչապետ Ռեջեփ Թայիփ Էրդողանը հեռախոսազրույցի ընթացքում հայտնել է Ֆրանսիայի նախագահ Նիկոլա Սարկոզիին, որ Թուրքիան կշարունակի ընդդիմանալ ՆԱՏՕ-ի հրթիռային «վահանին», եթե Իրանը շարունակի բնութագրվել որպես սպառնալիք` այդ համակարգի համար: Հղում անելով ՆԱՏՕ-ի անանուն աղբյուրին` նշվում է, որ խոսակցությունը փակ է եղել եւ թեժ: Բայց նաեւ չի նշվել, թե երբ է տեղի ունեցել այն: Թուրքիայի վարչապետը իշխանությունների սկզբունքներն այս հարցի շուրջ ներկայացրել է հոկտեմբերի 2—ին, ՆԱՏՕ-ի խորհրդարանական վեհաժողովի անդամների հետ հանդիպման ժամանակ:
Ըստ թուրքական Today’s Zaman-ի` այդ սկզբունքները Էրդողանը ներկայացրել է նաեւ Սարկոզիին:
Էրդողանի խոսքով, իրենք իրանական կողմի հետ շատ են քննարկել միջուկային ծրագրի խնդիրը, սակայն միաժամանակ նշել է, որ Իրանն իրավունք ունի ուրանի հարստացումն իրականացնել` էներգետիկ խնդիրները լուծելու համար: Ըստ Էրդողանի` նա դեմ չէ հակահրթիռային համակարգի տեղադրմանը, սակայն այդ համակարգը պետք է լինի ոչ թե հարձակողական, այլ պաշտպանողական բնույթի:
«Ցանկացած ուղիղ հղում նրան, որ Իրանը կամ այլ հարեւան երկիր վտանգ են հակահրթիռային պաշտպանության համակարրգում, հարվածում է Անկարայի արտաքին քաղաքական հիմնական ուղղությանը` «զրո խնդիրներ հարեւանների հետ»:
Նույնը կրկնել է Թուրքիայի արտգործնախարար Ահմեդ Դավութօղլուն Պեկին կատարած այցի ժամանակ: