«Հանրապետություն» կուսակցության անդամ, ՆԳ նախկին նախարար Սուրեն Աբրահամյանը համոզված է, որ Ղարաբաղյան հարցը մի օր անպայման լուծվելու է, սակայն լուծման լավագույն տարբերակը ազատագրված տարածքների բնակեցումն է, ԼՂ զարգացումը՝ իր թիկունքին զգալով հզոր Հայաստանի աջակցությունը: Աբրահամյանը հայտարարեց, որ Ղարաբաղից Երեւան եկած ու այստեղ բիզնեսներ հիմնած բոլոր պաշտոնյաները պետք է գնան Ղարաբաղ. «Հողը պահվելու է այնտեղ ապրող մարդկանցով: Միկա, Ֆլեշ, Ֆրեշ, թող բոլորը գնան Ղարաբաղ եւ այնտեղ հիմնեն իրենց բիզնեսները: Հողը պահում են նրա վրա ապրելով: Ով պաշտոնից զրկվում է, գալիս է Հայաստան»: ՀՀԿ-ական Արտակ Դավթյանը համաձայնեց, որ պետք է բնակեցնել Լեռնային Ղարաբաղը՝ միաժամանակ նշելով, որ «այնտեղ ապրելը պետք է լինի նաեւ շահութաբեր», ինչի համար հարկավոր է զարգացնել թե՛ Հայաստանը, թե՛ Լեռնային Ղարաբաղը: Սուրեն Աբահամյանն էլ ասաց. «Ես կոնկրետ մարդկանց մասին եմ ասում, որոնք հեղինակություն են: Եթե այդ հեղինակավոր մարդիկ ապրեն Ղարաբաղում, ոչ ոք չի կարող հայտարարել, թե տարածքները հանձնելու են: Այսօր բոլորը խոսում են, թե Սերժ Սարգսյանի եղբայրը դառնալու է ԵՊՀ-ի ռեկտոր, սակայն նրա եղբայրը պիտի լիներ Շուշիի համալսարանի ռեկտորը: Սաշիկը պիտի լիներ Ղարաբաղի ավտոբուսային պարկի պետ: Ռոբերտ Քոչարյանը պիտի ներողություն խնդրի այս ժողովրդից եւ իր տղաներից հետո «Ստեֆանո Ռիչին» բացի Ստեփանակերտում»: