Թուրքական Yeni Çağ թերթի փոխանցմամբ, Մարդու իրավունքների եվրոպական դատարանը (ՄԻԵԴ) ընդունել է 3 թուրք բարձրաստիճան զինվորականների հայցն ընդդեմ թուրքական պետության:
Նրանք ձերբակալվել էին Balyoz («Կռան») ռազմական հեղաշրջման շրջանակներում, քանի որ նրանց անունները շոշափվում էին Balyoz-ի բաղկացուցիչ մասերից մեկը հանդիսացող «Սուգա» պլանում:
Խոսքը Թուրքիայի ռազմածովային ուժերի ձերբակալված ծովակալներ Ջեմ Գյուրդենիզի, Ջեմ Ազիզ Չաքմաքի և Ալի Սեմիհ Չեթինի մասին է, որոնք իրենց փաստաբանների միջոցով ՄԻԵԴ էին դիմել 2010 թվականի սեպտեմբերի 3-ին` գտնելով, որ իրենց ձերբակալությունն ընթացել է ապօրինի ճանապարհով:
Դեկտեմբերի 9-ին ՄԻԵԴ-ը ծովակալների փաստաբաններից պահանջել էր «Սուգա» պլանի հետ կապված փաստաթղթերը, որոնց ստացումից ու ուսումնասիրումից հետո էլ որոշում է կայացվել ընդունել թուրք ծովակալների դատական հայցը:
Նշվում է, որ եթե ՄԻԵԴ-ը բավարարի նրանց հայցը, ապա բացառված չէ, որ Balyoz-ի գործով մյուս կասկածյալների ձերբակալման գործընթացն էլ ճանաչվի ապօրինի:
Հիշեցնենք, որ 2010 թվականի հունվարի 20-ին թուրքական Taraf թերթը հրապարակեց 2003 թվականին պլանավորված Balyoz ռազմական հեղաշրջման պլանի մանրամասների վերաբերյալ մի հոդված: Այդ պլանը հավանության էր արժանացել զինված ուժերի 162 սպաների, այդ թվում նաև` 29 գեներալների հանդիպման ժամանակ:
Balyoz-ի նպատակներին հասնելու համար մշակվել էին «Չարշաֆ», «Սաքալ», «Օռաժ» և «Սուգա» գործողությունները: «Չարշաֆ» գործողության պլանում առկա էր Ժանդարմերիայի կապիտան Հյուսեյին Թոփուզի, իսկ «Սաքալ» պլանում` Ժանդարմերիայի մայոր Հյուսեյին Օզչոբանի ստորագրությունը: Այս երկու գործողությունները նախատեսում էին հարձակումներ իրականացնել ստամբուլյան մզկիթների վրա: Ընդ որում՝ «Չարշաֆը» դա պլանավորել էր Ֆաթիհ մզկիթի, իսկ «Սաքալը»` Բեյազըթի դեմ:
Ինչ վերաբերում է «Օռաժ» գործողությանը, ապա դա ստորագրել է Իբրահիմ Ֆըրթընան: Դրա համաձայն` թուրքական կործանիչը պետք է ներխուժեր հունական օդային տարածք` դրանով իսկ օդային մարտ հրահրելով այդ երկրի ռազմաօդային ուժերի հետ:
Մարտի արդյունքում հունական ռազմաօդային ուժերը պետք է ցած գցեին թուրքական կործանիչը: Եթե չհաջողվեր նման կերպ Հունաստանին դրդել դիմելու ուժային քայլերի, ապա թուրքական վերստեղծված «հատուկ նշանակության նավատորմն» ինքը պետք է վայր գցեր սեփական կործանիչը և դրանում մեղադրեր Հունաստանին:
«Սուգա» պլանը ստորագրել է ռազմածովային ուժերի հրամանատար Օզդեն Օրնեքը: Սա նույնպես առնչվում էր Էգեյան ծովում ստեղծվելիք լարվածությանը:
