Ֆրանսիայի իշխանությունները Ելիսեյան պալատի պաշտոնական կայքից հեռացրել են նախկին նախագահ Սարկոզիի գործունեության մասին տեղեկությունները։ Ինչպես հայտնում է Le Monde-ը՝ կայքից օգտվողները կարող են տեղեկանալ միայն 2012-ի մայիսից հետո տեղադրված տվյալներին, այսինքն՝ երբ իշխանության եկավ սոցիալիստ Ֆրանսուա Օլանդը։
Կայքը գունավորման և կառուցվածքի առումով վերաձևավորվել է։ Նոր տարբերակի որոնման համակարգը Sarkozy բառը մուտքագրելու դեպքում ոչ մի տվյալ չի բերում։ Նախկին նախագահի և նրան նախորդող Ժակ Շիրակի մասին տվյալները զետեղված են, այպես կոչված, «կայքի արխիվային տարբերակում»։
Le Monde-ը նաև նշում է, որ Օլանդի վարչակազմը հայտարարել է, որ իրենք չեն ողջունում նաև արխիվային տարբերակը, և այն նույնպես պետք է շուտով հեռացվի։ Նրանք պատճառաբանում են, որ կայքը չպետք է միջոցներ ծախսի նման տեղեկատվությունները պահպանելու համար։ Շիրակի և Սարկոզիի մասին բոլոր տվյալները պահպանելը Ֆրանսիայի Ազգային գրադարանի (ՖԱԳ) պարտականությունն է։
Ելիսեյան պալատի պաշտոնական կայքը ստեղծվել է 1997-ին՝ նախագահ Շիրակի ընտրվելուց 2 տարի հետո։ Նախորդ նախագահին՝ Ֆրանսուա Միտերանին վերաբերող փաստաթղթերը չեն թվայնացվել և պահվում են ՖԱԳ արխիվներում։
elysee.fr-ը առաջին անգամ նորացվել է 2007-ին, երբ իշխանության եկավ Սարկոզին։ 2010-ին կայքի կառուցվածքը վերափոխվել էր, սակայն նախորդ նախագահների մասին տվյալները չէին հեռացվել։
Կայքի վերջին նորացման համար պետբյուջեից հատկացվել է 100.000 եվրո, Օլանդի էջի փոփոխություններն արժեցել են 50.000 եվրո։
Ներկայումս 110.000 մարդ կարդում է Ելիսեյան պալատի Twitter-ային էջը։ Facebook-ում նախագահ Օլանդի էջում գրանցված է 20.000 օգտատեր։ Նույն այդ սոցցանցի՝ Նիկոլա Սարկոզիի էջում, սակայն, գրանցված է 142.000 մարդ։
