«ՀայՌուսգազարդ» ՓԲԸ Վարչության նախագահ-Գլխավոր տնօրեն Վարդան Հարությունյանն աշխատանքային այց է կատարել Հրազդանի ՋԷԿ-ի 5-րդ էներգաբլոկ: Այս մասին ասվում է «ՀայՌուսգազարդի» տարածած հաղորդագրությունում: Ըստ Վ.Հարությունյանի, «Հրազդան-5»-ի աշխատանքները գրեթե ավարտված են:
«Միակ խնդիրը կապված է 1991թ. արտադրված շոգետուրբինի հետ: Մեր մասնագետների պրոֆեսիոնալիզմի շնորհիվ թերություններ են հայտնաբերվել շոգետուրբինի վրա, սարքավորումը ետ է ուղարկվել «Սիլովիե մաշինի» ԲԲԸ ` գործարանային պայմաններում թերությունները վերացնելու համար: Հուսով եմ, որ մինչև ապրիլի վերջ տուրբինը կլինի Հայաստանում, այնուհետև կսկվեն թողարկման-կարգաբերման աշխատանքները, որոնք կավարտվեն 1 ամսվա ընթացքում», – ասել է Վ.Հարությունյանը:
Էներգաբլոկի հզորությունը հասցնելով 480 ՄՎտ-ի և շահագործելով այն, «ՀայՌուսգազարդ» ՓԲԸ-ն ծրագրում է մասնաբաժին ապահովել էլեկտրաէներգիայի արտադրության շուկայում և ավելացնել էլեկտրաէներգիայի արտահանման ծավալները հարևան երկրներ:
Ըստ այդ հաղորդագրության` 2008-2010թթ. ընթացքում Հրազդանի ՋԷԿ-ի 5-րդ էներգաբլոկի շինարարության ավարտի և արդիականացման նպատակով ներդրվել է շուրջ 443 մլն ԱՄՆ դոլար, որից 248,8 մլն ԱՄՆ դոլարը` գույքային համալիրի ձեռքբերման նպատակով:
