«Գործընթացին հետևել եմ և կարծում եմ, որ մենք գոնե մի բան պետք է կարողանանք արձանագրել, որ թեկնածուների թափանցիկ ընտրություն եղավ: Այս պայմաններում ես չգիտեմ, թե ինչ տարաձայնություններ կարող են լինել»,- այսօր «Առաջին լրատվական»-ի հետ զրույցում, անդրադառնալով ՄԻԵԴ-ում Հայաստանի դատավորի թեկնածուների ընտրության գործընթացին, ասաց ՄԻԵԴ նախկին դատավոր, ներկայումս ՍԴ անդամ Ալվինա Գյուլումյանը:
Վերջինս ծանոթ չէր «Իրավունքի Եվրոպա» ՀԿ-ի մտահոգություններին՝ կապված թեկնածուների գրանցման գործընթացի հետ: «Հիմնական մտահոգությունն այն էր, որ թեկնածուներից ոմանք ուշ են դիմել, դիմումները ուշ են ստացվել և այլն: Ինձ հանձնաժողովից հավաստի ապացույցներ ներկայացվեցին, որ թեկնածուները դիմել են ժամանակին, մնացածը փոստի խնդիրն է»,- ասաց նա:
Ինչ վերաբերում է արդեն իսկ ընտրված 3 թեկնածուներին, տիկին Գյուլումյանըն ասաց. «Կարծում եմ՝ նորմալ թեկնածուներ են, մնացածը Եվրոպայի խորհուրդը կասի: Եթե Խորհուրդը գտավ, որ թեկնածուներից որևէ մեկը չափանիշներին չի համապատասխանում, հնարավոր է, որ ցուցակը վերադարձվի, որից հետո նոր պետք է նա հարցազրույցի փուլ անցնի և նոր միայն՝ Խորհրդարանական վեհաժողովում ընտրության փուլ»:
«Կարծում եմ, որ մեր ընտրությանը գնահատկան կտրվի նաև եվրոպական կառույցների կողմից, և այդ ժամանակ կհամոզվեք, թե որքանով էր ճիշտ մոտեցումը կամ սխալ»,- հավելեց Գյուլումյանը: