Շիրակի մարզի ընդհանուր իրավասության դատարանում Մարտին Սարոյանի նախագահությամբ ավարտվել է Նիկոլ Ս.-ի գործի դատական քննությունը:
31-ամյա Նիկոլը մեղավոր է ճանաչվել մարդու առևանգման փորձ կատարելու համար՝ ՀՀ քրեական օրենսգրքի 34-131 հոդվածի 1-ին մասով: Նիկոլը, ըստ դատական ակտի, փորձել է առևանգել իր… նախկին կնոջը…
2014 թվականի մայիսի 22-ին, ժամը 10-ի սահմաններում Նիկոլն իր ազգականի ու ծանոթի հետ, վերջինիս մեքենայով Գյումրի քաղաքում երթևեկելու ժամանակ պատահաբար տեսել է նախկին կնոջը: Ցանկացել է խոսել նրա հետ, հաշտվել: Խնդրել է մեքենան կանգնեցնել:
Իջել է մեքենայից, մոտեցել նախկին կնոջը, փորձել է խոսել:
Կինը մերժել է: Այդ ժամանակ, ըստ դատական ակտի, Նիկոլի մոտ դիտավորություն է առաջացել առևանգելու նախկին կնոջը, այդ եղանակով վերականգնելու ընտանիքը:
Նա բռնություն է գործադրել, բռնել է նախկին կնոջ ձեռքերից, գրկել է նրան ու փորձել է ստիպողաբար մեքենա նստեցնել:
Բայց իր կամքին հակառակ՝ Նիկոլը հանցավոր արարքն ավարտին չի հասցրել, որովհետև չի կարողացել հաղթահարել կնոջ դիմադրությունը:
Նախաքննության ընթացքում և ընդհանուր իրավասության դատարանում Նիկոլ Ս.-ն իրեն մեղավոր է ճանաչել, զղջացել է, նրա միջնորդությամբ գործը քննվել է արագացված ընթացակարգով:
Տուժողը չի առարկել, որևէ պահանջ չի ներկայացել, միայն խնդրել է, որ նախկին ամուսինն իրեն չանհանգստացնի:
Դատարանը հաշվի է առել, որ ամբաստանյալը նախկինում դատված չի եղել, հարևանների կողմից բնութագրվել է դրական: Ըստ դատական ակտի՝ ամբաստանյալն ունի մեկ անչափահաս երեխա:
Ընդհանուր իրավասության դատարանը Նիկոլ Ս.-ին մեղավոր է ճանաչել մեղսագրված արարքի համար, դատապարտել է 2 տարի ազատազրկման, կիրառել է պայմանական դատապարտություն և սահմանել 2 տարի փորձաշրջան: