Շենգավիթ վարչական շրջանի ընդհանուր իրավասության դատարանում Նելլի Բաղդասարյանի նախագահությամբ սկսվեց Ռոման Դավթյանի գործի դատական քննությունը:
Ըստ մեղադրանքի՝ 2014 թվականի մարտի 6-ին, առավոտյան ժամը 8-ին Երևան քաղաքի «Կարմիր բլուր» գերեզմանատան տարածքում Ռոման Դավթյանն իր կողմից օգտագործվող «Ֆոլքսվագեն գոլֆ» մեքենայի մեջ Լիանա Պ.-ի առողջության համար վտանգավոր բռնություն գործադրելով՝ բռունցքներով հարվածել է նրա դեմքի ու մարմնի տարբեր մասերին, նրա առողջությանը զույգ ակնակապիճների ստորին կոպային շրջանների արյունազեղումների, գանգուղեղային տրավմայի, քթոսկրի կոտրվածքի ձևով պատճառել է թեթև վնաս՝ առողջության կարճատև քայքայումով:
Այնուհետև, առաջադրված մեղադրանքի համաձայն, Ռոմանը մեքենայի սրահի վահանակի վրայից վերցրել է Լիանայի դրամապանակը, դրա միջից հափշտակել 10 հազար դրամ և իր մոտ գտնվող, որպես զենք օգտագործված «Մակարով» տեսակի օդամղիչ ատրճանակով դիտավորությամբ կրակել է Լիանայի ճակատին ու աջ ոտքին՝ գլխի ճակատային հատվածի և աջ սրունքի սալջարդ վերքերի ձևով տուժողի առողջությանը պատճառել է թեթև վնասի հատկանիշներ չպարունակող վնասվածքներ:
Այս ամենից հետո, ըստ մեղադրանքի, Ռոման Դավթյանը Լիանա Պ.-ին տեղափոխել է Երևան քաղաքի Բագրատունյաց պողոտա ու հեռացել է:
Ռոման Դավթյանին մեղադրանք է առաջադրվել զենքի գործադրմամբ ավազակային հարձակում կատարելու համար՝ ՀՀ քրեական օրենսգրքի175 հոդվածի 2-րդ մասի 4-րդ կետով:
Որպես իրեղեն ապացույցներ քրեական գործին կցված են ամբաստանյալի և տուժողի հագուստները, «Մակարով» մոդելի ատրճանակը, տուժող Լիանա Պ.-ի ճակատից հանված գնդակը…
Դատարանը ճշտեց կալանքի տակ գտնվող ամբաստանյալի ինքնությունը:
30-ամյա Ռոմանը ծնունդով Վայքից է, ապրել է Երևանում, միջնակարգ կրթություն ունի, նախկինում դատված չի եղել: Նրա խնամքին է 3 տարեկան դուստրը:
Դատական նիստին չէր ներկայացել տուժող Լիանա Պ.-ն: Առանց տուժողի դատական նիստը շարունակելուն դեմ էին ինչպես մեղադրողը, այնպես էլ պաշտպանական կողմը:
Նախագահողը տեղեկացրեց, որ տուժողին ուղարկված ծանուցագիրը հետ է վերադարձվել:
Լսելով կողմերին՝ դատարանը հետաձգեց նիստը և որոշեց տուժողի տրամադրած բոլոր հասցեներով ծանուցագրեր ուղարկել, ինչպես նաև ոստիկանությանը հանձնարարել, որ գտնեն տուժողին ու առայժմ զգուշացնեն, որ հաջորդ նիստին ներկայանա դատարան:
Եթե դարձյալ չներկայանա, դատարանը կարող է և բերման ենթարկելու որոշում կայացնել: