ՄԱԿ-ում նոյեմբերի 2-ին առաջին անգամ կնշեն Լրագրողների դեմ հանցագործությունների անպատժելիության դադարեցման միջազգային օրը՝ հաղորդում է «ՄԱԿ-ի ռադիո»-ն:
Ըստ լրագրողների պաշտպանության հարցերով ՄԱԿ-ի կոմիտեի՝ 2004-ից 2013-ին սպանվել է առնվազն 370 լրագրող: Նրանց մահը այս կամ այն կերպ կապված է եղել մասնագիտական գործունեության հետ: Նշվում է, որ մահվան դեպքերից 333-ն անպատիժ է մնացել:
Լրագրողների պաշտպանության հարցերով կոմիտեում հատկապես ուշադրություն են հրավիրում Ուկրաինայում աշխատող թղթակիցների ճակատագրի վրա: Այնտեղ տարվա սկզբից սպանվել են 7 լրագրող և ԶԼՄ-ների ներկայացուցիչներ, շատերը տուժել են ֆիզիկական բռնությունից:
Նշենք, որ Լրագրողների դեմ հանցագործությունների անպատժելիության դադարեցման օրը հաստատող բանաձևը ընդունվել է 2013-ին՝ ՄԱԿ-ի Գլխավոր ասամբլեայի կողմից: Ամսաթիվն ընտրվել է ի հիշատակ 2 ֆրանսիացի լրագրողների, որոնք զոհվել էին 2013-ի նոյեմբերի 2-ին՝ Մալիում:
