Շիրակի մարզի ընդհանուր իրավասության դատարանում Հարություն Մովսեսյանի նախագահությամբ ավարտվել է Շավարշ Գ.-ի գործի դատական քննությունը:
Ըստ դատական ակտի՝ 23-ամյա Շավարշը 2014 թվականի հունիսի 20-ին, ժամը 18-ի սահմաններում Գյումրիի «Սուրբ Հակոբ Մծբինեցի» եկեղեցու մոտակայքում տեսել է, որ մի աղջիկ իր նախկին կնոջն ու նրա քրոջը ծաղկեփնջեր է նվիրել:
Շավարշն ու իր մայրը մոտեցել են Շավարշի նախկին կնոջն ու նրա քրոջը: Ցանկացել են պարզել, թե ով է ծաղկեփնջերը նվիրել:
Նրանք վիճաբանել են, Շավարշի նախկին կնոջ ու նրա քրոջ հետևից գնացել են առաջինի բնակարան, շարունակել են վիճել: Այդ ընթացքում Շավարշը, ըստ դատական ակտի, ծեծել է նախկին կնոջը, ապտակել է, քաշքշել մազերից՝ նրա առողջությանը պատճառելով թեթև վնասի հատկանիշներ չպարունակող վնասվածքներ:
Շավարշ Գ.-ին մեղադրանք է առաջադրվել ՀՀ քրեական օրենսգրքի 118 հոդվածով:
Տուժող կինը հայտնել է, որ ինքն ու Շավարշն ամուսնացել են 2008 թվականին: Ունեն 2 անչափահաս երեխա:
Ընտանեկան անախորժությունների պատճառով դեպքից երեք ամիս առաջ ամուսնալուծվել են: Ինքն ու երեխաները մնացել են իրենց վարձակալած բնակարանում, իսկ Շավարշը գնացել է ծնողների տուն:
Դեպքի օրը ինքն ու քույրը իրենց երեխաների հետ զբոսնել են եկեղեցու մոտ: Քրոջ հեռախոսին զանգ է եկել, մի աղջիկ ներկայացել է որպես «Բրաբիոն» սրահի աշխատակցուհի, ասել է, թե նրան ինչ-որ մեկը ծաղկեփունջ է նվիրել: Այդ աղջկան քույրն ասել է, թե որտեղ են, աղջիկը մոտեցել է իրենց: Նրա ձեռքին երկու ծաղկեփունջ է եղել, մեկը նվիրել է իրեն, մյուսը՝ քրոջը, ասել է, թե ծաղկեփնջի մեջ երկտող կա: Աղջիկը ծաղիկները տվել ու արագ հեռացել է:
Քույրը փորձել է կարդալ երկտողը, բայց այդ ժամանակ իրենց են մոտեցել Շավարշն ու նրա մայրը:
Շավարշը մոտեցել է իր քրոջը, ասել է, թե նա եկել է, որ իրենց տունը քանդի: Հետո հարցրել է, թե ո՞վ է ուղարկել ծաղկեփնջերը: Վերցրել է երկտողը, կարդացել ու պատռել:
Շավարշի մայրը մոտեցել է, իր ու քրոջ ձեռքից վերցրել է ծաղկեփնջերը, դրանցով հարվածել է իրեն, հետո քրոջը:
Շավարշն ու մայրը վիրավորական բառեր են ասել իրենց: Ինքն ու քույրը երեխաների հետ շտապ դեպի իրենց տուն են գնացել:
Շավարշն ու մայրը եկել են իրենց հետևից:
Շենքի շքամուտքում Շավարշը հրել է իրեն: Նա ու մայրը մտել են իրենց տուն: Շավարշը ոլորել է իր ձեռքը, հայհոյել է, բջջային հեռախոսով խփել է իր գլխին, ապտակել է, կոտրել է սեղանին դրված ափսեն և իրեն սպառնացել է, թե կոկորդը կկտրի:
Այդ ամենը եղել է երեխաների ներկայությամբ, նրանք լաց են եղել: Շավարշն ու մայրը հեռացել են:
Ինքն ու քույրը երկտողի կտորները միացրել ու կարդացել են. «Իր սիրելի Գարիկից իր սիրելի ….-ին»: Բայց քույրը ոչ մի Գարիկի չի ճանաչել: Այդ ամենը, իրենց կարծիքով, Շավարշն ու նրա մայրն էին կազմակերպել, որ քույրը վախենար ու օգներ Շավարշին՝ իրենց ընտանիքը վերականգնելու հարցում:
Քույրը զանգել է իրենց հորը, կանչել:
Դրանից հետո իր տուն են եկել Շավարշի մայրն ու քրոջ սկեսուրը: Ինքը վերջինիս ներս է թողել, իսկ Շավարշի մորը՝ ոչ: Նա շքամուտքում աղմկել ու հեռացել է: Որևէ մեկը նրան չի հարվածել: Տուժողը պնդել է, թե ինքը նախկին ամուսնու հետ չի հաշտվում, ցանկանում է, որ նա իրեն ծեծելու համար ենթարկվի քրեական պատասխանատվության:
Ամբաստանյալ Շավարշ Գ.-ն իրեն մեղավոր չի ճանաչել, ներկայացրել է իր վարկածը, որը դատարանը անարժանահավատ է գնահատել:
Ըստ ամբաստանյալի՝ ինքն ու մայրը զբոսնել են ու պատահաբար են տեսել, թե ինչպես են իր նախկին կնոջն ու նրա քրոջը ծաղիկներ մատուցում: Ինքը մոտեցել է, կարդացել է ծաղիկների միջի գրությունը, որն ուղղված էր կնոջ քրոջը:
Իր մայրը զայրացել է, վերցրել է ծաղկեփնջերը, դրանցով մի-մի անգամ հարվածել է իր նախկին կնոջն ու նրա քրոջը:
Այնուհետև ինքն ու մայրը իր նախկին կնոջն ու նրա քրոջն ուղեկցել են մինչև տուն:
Այդ ընթացքում նախկին կինը ճանկռել է իր մոր պարանոցը, որի ժամանակ պոկվել է նրա արծաթե շղթան: Ինքը բռնել է նախկին կնոջ ձեռքը, որ նա չհամարձակվի մորը ճանկռել: Իր մայրն էլ զայրացած մի-մի անգամ էլ է այդ քույրիկներին հարվածել ծաղկեփնջերով:
Հետո իրենք գնացել են տուն:
Ինքը զանգել է նախկին աներոջը, կանչել, որ նա գա ու տեսնի, թե իր աղջիկներն ինչեր են արել: Նա էլ ասել է՝ լավ են արել:
Մայրը գնացել է նախկին կնոջ քրոջ սկեսուրի գյուղ, պատմել է ամեն բան ու նրա հետ եկել է նախկին կնոջ բնակարան: Ինքը մորը տեսել է ոստիկանությունում: Մայրը պատմել է, որ նախկին կնոջ տանը իրեն ծեծել են, դուրս են շպրտել, քթից էլ արյուն է եկել…
Նախաքննությամբ պարզվել է այն աղջկա ինքնությունը, ով ծաղկեփնջերը «մատուցել է» տուժող կնոջն ու նրա քրոջը: Այդ աղջիկը «Բրաբիոնի» աշխատող չի եղել: Ասել է՝ իբր իրեն մոտեցել են երկու անծանոթ տղաներ՝ երևանյան խոսվածքով, խնդրել են, որ զանգի մի հեռախոսահամարով, ծաղկեփնջերը նվիրի երկու կանանց:
Նախաքննությամբ պարզվել է նաև, որ դեպքի օրվա երեկոյան այդ նույն աղջկան զանգահարել է Շավարշի բարեկամ տղաներից մեկը…
Ըստ հիշյալ աղջկա՝ Շավարշը կապ չի ունեցել ծաղկեփնջեր նվիրելու հետ…
Ընդհանուր իրավասության դատարանը Շավարշ Գ.-ին մեղավոր է ճանաչել նախկին կնոջը ծեծելու համար և դատապարտել է 80 հազար դրամ տուգանքի:
Այս ամբողջ «եռուզեռը» ծավալվել է անչափահաս երեխաների աչքի առաջ. ահա թե ինչն է ամենամտահոգիչը…
