Վրացական Apsny.ge կայքի փոխանցմամբ, Աֆղանստանում ամերիկյան զորքերի հրամանատար Դևիդ Պետրեուսը շնորհակալական նամակ է գրել Վրաստանի պաշտպանության նախարար Բաչո Ախալայային`
ISAF-ի (International Security Assistance Force, Միջազգային անվտանգության աջակցության ուժեր) կազմում Վրաստանի ունեցած ներդրման համար.
«Իմ խորին շնորհակությունն եմ հայտնում Վրաստանին, որի 31-րդ և 32-րդ գումարտակները շատ կարևոր ներդրում են ունեցել Նիմրուզ ու Հիլմանդ նահանգներում անվտանգության ու կայունության ապահովման գործում:
Ձեր զորամիավորումները հաջողությամբ համագործակցում են Աֆղանստանի ազգային անվտանգության ուժերի և տեղական ինքնակառավարման մարմինների վերնախավի հետ: Աֆղան ժողովրդի հանդեպ ձեր զինվորների ցուցաբերած վերաբերմունքը նպաստել է ISAF-ի գործողությունների և Աֆղանստանի կառավարության հանդեպ վստահության ամրագրմանը»:
Հիշեցնենք, որ Աֆղանստանում ISAF-ի գործունեությունը սկսվեց 2001 թվականի վերջին: ISAF-ը կազմավորվեց 2001 թվականի դեկտեմբերի 20-ին ՄԱԿ ԱԽ թիվ 1386 բանաձևին համապատասխան: 2003 թվականից ISAF-ի հրամանատարությունն ստանձնել է ՆԱՏՕ-ի բլոկը:
2010 թվականի օգոստոսի դրությամբ Աֆղանստանում էր գտնվում 925 վրացի զինծառայող: