Վրացական Interpressnews.ge կայքի փոխանցմամբ, Աբխազիան Ռուսաստանին է ներկայացրել իր մշակած պետական սահմանագիծը: Այս մասին հայտարարել է աբխազական պատվիրակության ղեկավար, աբխազական խորհրդարանի պատգամավոր Վալերի Կվարչիան:
Վերջինիս խոսքերով, երեկ իրենք ներկայացրել են սահմանագծի անցկացման իրենց դիրքորոշումը: Սակայն Կվարչիան չի հայտնել իրենց դիրքորոշման մանրամասները:
Նշվում է, որ ռուսական կողմը պետք է ուսումնասիրի դա և ներկայացնի իր առաջարկները:
Մոսկվայում ռուս-աբխազական հանձնաժողովի նիստը կավարտվի ապրիլի 1-ին:
Հիշեցնենք, որ 2010 թվականի մայիսի 3-ին աբխազական խորհրդարանն ընդունեց «Աբխազիայի Հանրապետության պետական սահմանի մասին» օրենքը, որով նրա պետական սահման ճանաչվեց Ռուսաստանի հետ ունեցած ցամաքային սահմանը (ինչպես որ խորհրդային ժամանակներում էր):
Այժմ Ռուսաստանն Աբխազիային առաջարկել է իրեն հանձնել 160 կիլոմետր քառակուսի կազմող տարածք, սակայն Աբխազիան մերժում է այդ առաջարկը:
