Հորդանանի իշխանության կողմնակիցներին արգելվել է ցույց անցկացնել մայրաքաղաք Ամմանում: Այս մասին հայտնում է France Presse գործակալությունը` հղում կատարելով հորդանանյան բարձրաստիճան մի պաշտոնյայի, որը ցանկացել են մնալ անանուն: Միևնույն ժամանակ ընդդիմությանն այդ իրավունքից չեն զրկել, սակայն հատկացվել են հատուկ տարածքներ:
Ցույցերի անցկացման համար սահմանափակումները մտցվել են մարտի 25-ին տեղի ունեցած բախումներից հետո: Այդ ժամանակ իշխանությունների կողմնակիցները հարձակվել էին վրանային քաղաքի վրա, որը ընդդիմադիրները տեղադրել էին քաղաքի կենտրոնական հրապարակներից մեկում` պահանջելով իշխանության հրաժարականը:
Գիշերը նրանց փորձել է ցրել ոստիկանությունը, իսկ ցերեկը զանգվածային բախումներ են տեղի ունեցել իշխանության կողմնակիցների հետ: Բախումները տեղի են ունեցել ներքին գործերի նախարարության շենքի անմիջապես պատուհանների տակ: Արդյունքում մեկ մարդ զոհվել էր, հարյուրավորները, այդ թվում` ոստիկաններ, տուժել:
Հաջորդ օրը Ամմանում տեղի է ունեցել Աբդալլահ 2-րդը թագավորի կողմնակիցների հանրահավաք:
Երկուշաբթի օրը` մարտի 28-ին, Հորդանանի վարչապետ Մաարուֆ Ալ-Բահիթը կոչ է արել խորհրդարանին հատուկ տեղեր հատկացնել հանրահավաքների իրականացման համար, որպեսզի ընդհարումներ չլինեն, և ապահովվի ցուցարարների անվտանգությունը:
Հիշեցնենք, որ Հորդանանում հակակառավարական ցույցերը տեղի են ունենում տարվա սկզբից: Ընդդիմադիրների ճնշման տակ Աբդալլահ 2-րդ թագավորը պաշտոնանկ է արել վարչապետին: Դրանից հետո իրավիճակը երկրում որոշ չափով կարգավորվել է: Այնուամենայնիվ, որոշ ժամանակ անց գործող ռեժիմի հակառակորդները պահանջել են իրականացնել նոր բարեփոխումներ, որից հետո նորից լարված վիճակ է ստեղծվել:
