Հայաստանում հնարավոր չէ պարտադրել, որ արմիություններ ստեղծվեն, քանի որ դա միջազգային նորմերին է հակասում։ Բայց, ինչպես արդեն տեղեկացրել էինք, արհմիություններ կան և գործում են, այլ հարց է, թե նրանց գործունևությունը որքանով է արդյունավետ իրականացվում։ Հարկ է նկատել, որ արհմիության խնդիրն այն է, որ պաշտպանի աշխատողների աշխատանքային և դրա հետ կապված սոցիալական ու տնտեսական իրավունքները։
«Արհմիությունների կոնֆեդերացիա» կազմակերպության փոխնախագահ Բորիս Խառատյանը մեզ հետ զրույցում նկատեց, որ Հայաստանում արհմիությունների կայացման հարցում քաղաքացիների շրջանում իմացության և իրազեկվածության խնդիր կա։
«ՀՀ քաղաքացիները պետք է իրազեկված լինեն իրենց իրավուքների մասին, բայց, ցավոք, մեր առօրյայում բավարար չափով իրազեկված չեն։ Ըստ օրենքի՝ յուրաքանչյուր աշխատավայրում աշխատողները իրավունք ունեն ստեղծելու արհմիություն, ինչի համար անհրաժեշտ է ընդամենը 3 աշխատողի ցանկությունը։ 3 աշխատող եթե միավորվում են, հիմնադրում են արհմիություն, որից հետո մշակվում է կանոնադրությունը»,- ասաց Բորիս Խառատյանը։
Իսկ ՀՀ քաղաքացիների պասիվության և անտեղյակության արդյունքում ունենք այն, ինչ ունենք։