Կոսովոյի նախագահ Բեջեթ Պակոլլին հայտարարել է, որ հարգում է Սահմանադրական դատարանի որոշումը, որը նախօրեին որոշում էր կայացրել Պակոլիի ընտրությունը հակասահմանադրական ճանաչելու վերաբերյալ: Պակոլլին ասել է, որ դեռ չի ստացել պաշտոնական փաստաթուղթը, և ակնկալում է, որ դա կլինի մոտ ժամանակներում: «Կարծում եմ, որ ամենաուշը վաղը ես կստանամ Սահմանադրական դատարանի պաշտոնական որոշումը: Ես մտադիր եմ այն կատարել: Սահմանադրական դատարանի որոշումները սուրբ են, և դրանք պետք է կատարել»,- Պակոլլիի խոսքերն է մեջբերում ITAR-TASS-ը:
Ակնկալվում է, որ Պակոլլին ինքը կներկայացնի հրաժարականի դիմումը, կամ խորհրդարանը կնախաձեռնի նրա հրաժարականի գործընթացը: Տեղեկացնենք, որ երկուշաբթի օրը Կոսովոյի Սահմանադրական դատարանը, հիմք ընդունելով երկրի ընդդիմության ներկայացրած հայցն առա այն, որ ընտրության ժամանակ տեղի են ունեցել խախտումներ, որոշում է կայացրել հակասահմանադրական ճանաչել Պակոլլիի ընտրությունը:
Հիշեցնենք նաև, որ Պակոլլին սկանդալային հեղինակություն է ձեռք բերել այն բանից հետո, երբ Ռուսաստանի և Շվեյցարիայի դատախազությունները մեղադրեցին նրա ղեկավարծ ընկերությանը Կրեմլի վերանորոգման աշխատանքներն իրականացնելու համար մի քանի միլիոն դոլարի կաշառք տրամադրելու մեջ: Սերբական մամուլն էլ գրել էր, որ Պակոլլին կաշառքներ է տվել ՄԱԿ-ի գլխավոր քարտուղարի ներկայացուցիչ Մարտի Ահթիսաարիին, որն առաջարկել էր Կոսովոյի անկախության նախագիծը: