Այս տարի ևս ծիրանի բերքը անկում կունենա, չնայած բնակլիմայական պայմանները բարենպաստ են: Այսօր հրավիրված մամուլի ասուլիսի ընթացքում այս մասին ասաց «Հայաստանի ագրարագյուղացիական միավորում» ՀԿ նախագահ Հրաչ Բերբերյանը:
«Եթե բնակլիմայական պայմանները բարենպաստ են, ո՞րն է ծիրանի բերքի անկման պատճառը» հարցին Բերբերյանը արձագանքեց. «Հիմնական պատճառը կրծողներն են, որոնք հասցրել են 2-3 մետր խորության վրա ծառերի բները և արմատները կրծել, ինչի արդյունքում հսկայական տարածքով այգիներ այս տարի չորանալու են»։
Կրծողները, որոնք վնասել են նաև խաղողի վազերը, հիմնականում Աշտարակում են շատ տարածված: Բերբերյանը ասաց, որ ժամանակին բարձրաձայնել է, որ ցինկ ֆորսֆիտով կրծողների դեմ պայքարելը արդյունավետ չէ, սակայն գյուղնախարարությունը ականջալուր չի եղել, ինչի արդյունքում ունենալու ենք այն, ինչ կանխատեսվել էր՝ հսկայածավալ չորացած այգիներ: ՀԿ նախագահի խոսքերով, այսօր գյուղնախարարությունը լուրջ միջոցներ է ձեռնարկում. կրծողների դեմ պայքարելու համար 17 տոննա թունաքիմիկատ է բաժանվելու գյուղացուն, բայց սա շատ քիչ քանակություն է խնդիրն արմատախիլ անելու համար:
Սակայն եթե ցանկանում ենք, որ պայքարը արդյունավետ դառնա,ավելի մեծ ռեսուրսներ պետք է ներգրավվեն: Տարին վատ չի սկսվել գյուղատնտեսության համար, սակայն ձմեռվա երաշտի հետևանքով 5-10 տոկոս սերմնացուի կորուստ կունենանք, իսկ կարտոֆիլը շուկայում դեռևս երկու տարի կշարունակի 400 դրամով վաճառվել. չնայած կարտոֆիլի համար բարենպաստ բնակլիմայական պայմաններ են առկա, բայց սերմնացուի պակասը բերելու է կարտոֆիլի սուղի։
Պետությունը տնկանյութ է ներկրում, սակայն տնկանյութը ևս բավարար չէ, հետևաբար նախկին արդյունքն ունենալու համար դեռ երկու տարի ժամանակ է պետք: Այս տարի կէժանանա լոլիկի գինը, քանի որ պետությունը 500 հեկտարի համար գյուղացուն սերմնացու է բաժանել։
Գյուղատնտեսական մթերքի գների իջեցման համար Հրաչ Բերբերյանը առաջարկեց, որ վստահեն գյուղմթերք արտադրողին, ոչ թե փնովեն, և առաջարկեց գյուղմթերքի մեծածախ առևտրի համար քաղաքամերձ շրջանում հատուկ տեղ հատկացնել:
Հիշեցրեց, որ էրեբունի վարչական շրջանում նման փորձ արվեց, սակայն թաղային հեղինակությունները փորձեցին շուկան վերցնել իրենց ձեռքը, միաժամանակ նկատեց, որ շատ լավ է քաղաքապետարանի պայքարը փողոցային առևտրի դեմ, բայց շուկաներում 2,000 դրամ տեղի վարձ են ուզում, ինչը գյուղացու ծախսերը չի կոմպենսացնում, հետևաբար առաջարկեց գյուղատնտեսության զարգացման համար կամ տեղավճարները լինեն շատ էժան, կամ անվճար:
